Kabul airport-a innekbuainaah mi 7 an thi
Taliban firfiakten Afghanistan-a thuneihna an chan hnuah, Afghan mi tam tak chu an ram chhuahsan tumin Kabul Airport-ah an la pungkhawm chhunzawm zel. Nimin khan airport-ah pungkhawmte innekbuaina thlengah mi pasarih an thi nia sawi a ni.
August 15-a Taliban-ten thuneihna an chan aṭang khan mi sang tel chu airport-ah hian an ram chhuahsan theih dan remchang zawngin an pungkhawm tawh a ni. Kalkhawm an tam avangin airport-ah hian innekbuaina a thleng fo a, hliam pawh eng emaw zat an awm tawh.
US embassy chuan security warning tichhuakin, America mite chu US sorkar aiawhin a hrilh a nih loh chuan Kabul airport hi pan lo turin a ti. Germany pawhin an mi leh sate chu hriattir an nih hma chuan anmahni thua Kabul airport pan lo turin a hrilh tawh bawk a ni.
US Army major general William Taylor chuan airport-ah hian US sipai 5,800 vel an la awm mek tih sawiin, a hmunhmate pawh an him tih a sawi. Mipui innekbuai tur venna atan airport gate ṭhenkhat chu khar zawk a nih thu a sawi bawk. Taylor chuan US sipaite hian Kabul aṭangin mi 3,800 an hruai haw tawh tih sawiin, America mite bakah US sipaite tana lo thawk tawh, Afghan mite hruai chhuah a tum bawk.
Afghan mipuite Taliban rorelna hi an pawm a ngai : Hashmat Ghani
Afghanistan president ram danga tlanchhe mek, Asharf Ghani-a unaupa, Hashmat Ghani chuan Afghan mipuite chuan Taliban rorelna hi an pawm a ngai a ni tih a sawiin, hemi rual hian Taliban-te chu sorkar huamzau zawk siam turin a ngen.
Hashmat Ghani hian Taliban hruaitute pawh a lo kawm tawh a, Afghanisan aṭanga ram dang sipai awmte inlakchhuah fel hun a hnaih tawh avangin Afghanistan mipuite chuan thuneitu thar chu an pawm a ngai a ni, a ti.
US leh Spain-in Spain-a military base hman remti
US president Joe Biden leh Spain prime minister Pedro Sanchez-te chuan Spain chhim lama military base pahnih chu Afghan mi, US sorkar tana lo thawk ṭhinte lo dawnsawnna hmun atana hman an remti.
Moron leh Rota-a military base-te chu US sorkar hnuaia lo thawk tawh, Afghanistan mite hruaichhuahna atan hman a ni dawn a, heta ṭang hian ram dangah hruai leh an ni ang. Inrinni khan ram pahnih hruaitute hi inbiain, he inremna hi an siam a ni.
Spain hian Madrid khaw daiah EU hnuaia lo thawk tawh, Afghan mi hruai chhuahte awmna tur reception centre a lo hawng tawh bawk.
Taliban co-founder in Kabul a thleng
Taliban dintu zinga mi, Mullah Baradar chu an pawl hruaitu dangte nena inbe turin Inrinni khan Kabul a thleng tawh.
Baradar hian Afghanistan-a sorkar thar din dan tur chungchang chu an pawl hruaitute hi a sawipui dawn a, internal security leh financial chungchang buaipuitu tur pawh team hran siam an ni. Official chuan sorkar hmasaa expert-te pawh biakrawn an ni dawn tih a sawi.
Kum 2020-a US nena inremna an siamah pawh khan Baradar hi Taliban aiawhte ber niin, Afghanistan hruaitu hluite nen pawh an lo inbe fo tawh a, hei vang hian sorkar thar siam turah pawh hian a pawimawh chho hle dawn a ni.
Afghanistan aṭanga ram dang sipaite inlakchhuah fel hun tura lo ruahman tawh, August 31 hma chuan Taliban-te hian sorkar thar siam chungchang hi an puang dawn lo nia sawi a ni.
Baradar bakah ram danga biru, Taliban hruaitu dang ṭhenkhat pawhin Aghanistan hi an pan tawh hlawm. An zingah hian US-i nmo-wanted terrorist-a puang zinga mi, a lu man atana USD mtd. 5 a phal, Khalil Haqqani pawh Kabul-ah a awm tawh bawk.