Myanmar sipaite'n journalist man belh zel

Myanmar sipai kaihhruai sorkar chuan tualchhung journalist pahnih an manbelh leh tih sipai thuhnuaia awm television chuan Inrinni khan a puang. February 1-a civil sorkar paihthlak a nih aṭang khan media mi ṭhahnem tak an lo man tawh a ni.

Myawaddy TV chuan journalist mante hi Frontier Myanmar columnist leh Voice of America radio commentator Sithu Aung Myint bakah BBC Media Action-a freelance producer Htet Htet Khine te an ni tih a sawi.

Sithu Aung Myint hi sorkar dodal zawng thu sawi leh, thu dik lo thehdarhah puh a ni a, mipuite chu sipaite dodal a,nawrh huaihawtna zawm tur leh helpawlte thlawp turin a fuih a ni, an ti. Htet Htet Khine hi pawikhawihtu nia rinhleh Sithu Aung Myint alo humhim avang leh National Unity Government (NUG) thlawp zawnga a chet avanga man a ni thung. Reporters Without Borders (RSF) in an pahnih hian inbiakpawh pawh phalsak an ni lo tih a sawi bawk.

BBC Media Action chuan journalist-te man an ni chu an dem thu sawiin, journalist-te chunga an chet danah sipai sorkar chu a rawng hle tih a tilang chiang a ni, a ti. Myanmar tualchhung buaina kalzel vang hian mipui 1,000 chuang an thi tawh tih activist group pakhat chuan a tarlang.

Sipaite hian news outlet tam tak licence chu a lo sut sak tawh a, media hnathawh chu zah hle mah se news dik lo leh mipui ti phawklek thei chu thehdarh an phal tawh dawn lo tih a sawi.

Human Rights Watch chuan civil sorkar paihthlak anih aṭang khan sipai sorkar chuan journalist 98 an man tawh thu leh, an mi man zinga mi 46 te chu hren mek an la nih thu a sawi a ni.