China-ah school hawng leh ṭan

Covid-19 len ṭanna ram, China-ah chuan hri leng hian ziaawm lam panin mipui nunphung pawh a pangngai chho leh ṭan mek. 

Guizhou province leh Xinjiang Uygur Autonomous Region-ah chuan hri leng vanga school kharte chu Thawh­ṭanni aṭang khan hawng ṭan leh a ni a, senior leh junior high school zirlai maktaduai 1.5 chuangten an zirlai an chhunzawm leh thei ta. 

Guizhou leh Xinjiang-ah hian thla khat dawn chu hri kai thar an awm tawh lo a ni. School-ah hian zirlaite chu a thlawnin hmai­tuamna sem vek an ni a, ei tur pawh a hrana pek vek an ni bawk. Classroom, canteen leh dormitory-te pawh damdawi hmanga tihfai vek niin, zirlaite pawh insi loa ṭhut tirin, ni khatah an temperature vawi thum laksak an ni. Bial dangah pawh bo­ruak a pangngai chhoh zel chuan school tam zawk pawh hawn thuai an ni ang.