NKorea-in Syria chemical weapon factory-te hmanrua a pe

North Korea chuan Syria-a chemical ralthuam siamna factory-te chu hmanrua a pe niin US media report chuan a tarlang.

Chemical ralthuam siamtu factory-te hnena hmanrua a thawn zingah hian acid-resistant tile, valve leh pipe-te pawh a tel a ni. Hei hi UN resolution a zawm leh zawm loh zirhciangtu, UN Panel of Expert-in an zirchianna aṭanga an hmuhchhuah nia sawi a ni a, mahse expert-te report hi tlangzarh a la ni lo.

The New York Times chuan UN report-ah hian NKorea missile specialist-te pawh Syria rama ralthuam siamna hmunahte hmuh an nih thu an sawilang niin a tarlang. Mahse Syria sorkar chuan UN panel hnenah hian an rama North Korea mi awm chu sport coach leh infiammite chauh niin a hrilh thung.

Syria sorkar hian helho awmna biala a sipaite beihpui a thlaktirnaah mihring tana hlauhawm, chlorine gas a hmantir nia puh a ni a, mahse he puhna hi Syria sorkar chuan a pha thung.

North Korea hian nuclear programme a kalpui mek avangin UN bakah khawthlang ram eng emaw zat chuan an hrek mek a ni. Tun hnaiah US chuan hrekna thar a siam belh leh bawk.

NKorea-in hmanrua a thawnluh zingah acid-resistant tile hi chemical ralthuam siamchhuahna hmun siamnaah hman nia sawi a ni. NKorea hian kum 2016 kumtawp lam leh 2017 kumtir lam khan Chinese trading firm kaltlangin Syria-ah hian lawnglian panga a tir nia sawi a ni. Syrian sorkar hnuaia agency, Scientific Studies and Research Center (SSRC) pawhin NKorea company eng emaw zat chu sum a pe bawk a ni.

Syria hian Chemical Weapons Convention zawmin, kum 2013 khan chemical ralthuam a neihte tichhiat vek a lo remti tawh a ni. He inremna hi Ghouta-a 'sarin gas' hmanga beihpui thlaknaa mi tam tak thihna a thlen hnua siam a ni. Syria sorkar hi beihpui a thlaknaah danin a khap, chemical ralthuam hmang foah puh a ni.

Organisation for the Prohibition of Chemical Weapons (OPCW) chuan nikum April thla khan Idlib province-a Khan Sheikhoun-ah 'sarin nerve gas' thlak a ni tih sawiin, he tur hman a nih vang hian mi 80 chuang an thi a ni. UN investigator-te chuan he thil hi Syria sipaite tih niin an puh. Syria sipaite chet dan duh lohna lantirin US chuan Syria air base chu missile hmangin a bei zui nghal a ni.