Kim Jong un-an Brazilian passport a hmang

North Korea ram hotu Kim Jong Un leh a pa kum 2011-a thi, Kim Jong Il-te khan kum 1990 chho-ah khan khawthlang ram tlawha zinna turin Brazilian passport an hmang ṭhin nia sawi a ni.

North Korea-a roreltu chhungkuate hian hming dang hmanga travel document siamin an zin fo ṭhin nia sawi a lo ni tawh a ni. West European security senior official pakhat chuan Kim-te pafa-in Brazilian passport an hman thu hi sawichhuakin, an thlalak pawh a chuang ngei niin a sawi. Hengte hi foreign embassay-a visa hmuhna atan an hmang ṭhin a ni, a ti.

Brazil-a North Korea embassy chuan hemi chungchang hi engmah a sawichiang duh lo. Hetihlai hian Brazil foreign ministry chuan a chhui chian mek thu a sawi thung.

Western European security senior official dang pali pawhin Kim-te pafa hian Brazilian passport hi Josef Pwag leh Ijong Tchoi tih hmingin an siama, hei hi khawthlang ram dang pahniha zin phalna, visa dilna atan an hmang niin an sawi. He passport hmanga visa an dil hi pek an nih leh nih loh erawh a sawilang lo.

Japan chanchinbu Yomiuri Shimbun pawhin Kim Jong-un a naupan lai, kum 1991 khan Brazilian passport hmangin Japan a lo tlawh tawh niin kum 2011 khan a lo tarlang tawh bawk a ni.

Kim Jong-un passport hi Joser Pwag tih hminga siam niin, a pian kum pawh February 1, 1983 nia ziah a ni a, Brazil-a Sao Paulo-a piang anga ziah a ni bawk. Jong-un pian kum leh a pianna hmun dik tak hi tarlan a ni ngai lo a, Brazil passport siamsak a nih lai hian kum 12-14 inkar vel a nih rin a ni. Jong-un hian Berne, Switzerland-ah lehkha a zir ṭhin a, he hmunah hian embassy motor khalhtu, chauffeur fapa angin a awm ṭhin a ni.