Venezuela President thlan hun tur sawn hla

Venezuela National Electoral Council (CNE) chuan April 22-a an ram president thlan tur chu sawn hlain, May 20 ah inthlan hi neih a ni dawn tih a sawi.

Sorkar leh eptu party hrang hrang aiawhten inbiakna an neih hnuah inthlan hun sawn hlat hi an remti a ni.

President Nicolas Maduro chuan a term hnihna atan inthlan hi chuh leh a tum a ni.

CNE hotu Tibisay Lucena chuan sorkar in inthlan neih tur chungchanga eptu thil phutte a remtihpui thu a sawi. UN hotu Antonio Guterres pawh inthlan neih tur enpui tura observer mission tir turin sawm a ni dawn a ni.

Tihdan phung pangngaiah chuan Venezuela president hlan hi December-ah neih a ni ṭhin. Mahse February thla khan kumin inthlan hun hi sawn hnaiin, April 22-ah neih a nih tur thu a puang a ni. Mahse hei hi eptu lam chuan nasa taka sawiselin, eptu ṭangrualte ṭhendarh tumna ruahmanna niin an puh a, an lungawi loh thu pawh an tilang a ni. Hei bakah hian sum leh pai lamah Venezuela-in harsatna nasa tak a tawh a, an ram mipuite ei tur ṭha duhkhawp neih loh lai leh ei tur hnianghnar tawk loh vanga ram danga mi sang tel an tlanchhiat lai a ni a, hei vang hia ram dang hruaitute eng emaw zat pawhin inthlan sawn hma a ni hi an sawisel a, inthlan result hi an pawmpui loh tur thu an sawi.

US sorkar chuan Venezuela sorkar hian president inthlan hi a kaltlangpui a nih chuan dik lo taka thiltiah a ngai dawn tih sawiin, an sorkar hrekna na zawk siam a tum thu a sawi a ni.

Eptu pawl lian ber Democratic Unity ṭangrual pawl chuan April 22-a president thlan tur chu an boycott dawn tih sawin, President Maduro khingtu tur candidate pawh a siam duh lo a ni.