Bangladesh-in ramri-a Myanmar sipai dahbelh sawisel

Bangladesh chuan Myanmar nen an inri-naa Myanmar sipai dahbelh an ni chu sawiselin, Ningani khan an rama Myanmar ambassador pawh koin an lungawi loh thu an hrilh.

Myanmar-a Rakhine state-a sipaiten beihpui an thlak avangin Rohingya Muslim nuai tel chu Bangladesh ramah hian an tlanchhe tawh a ni. Raltlan zinga tam tam hi ramri, Myanmar ram chin nia sawiah an awm a, mahse United Nations refugee agency chuan heng mite awmna hi Myanmar border fence piah lam a ni avangin tu ram mah a ni lo niin a sawi.

Nikum August 25-a Myanmar sipaiten beihpui an thlak hnua Bangladesh-a Rohingya tlanchhia hi nuai sarih dawn an tling tawh a, an zinga 5,300 vel chu border line-a camp-ah an khawsa mek a ni.

Raltlante hruaikir tur hian Myanmar leh Bangladesh sorkar pawh an inbe rem tawh a, mahse a taka kalpui a la ni lo. Hetih lai hian raltlan tam tak chuan Myanmar sorkarin an himna tur pek ngei a tiam phawt loh chuan an tan kir leh hi a la him tawk lo niin a sawi.