Khawvel hmun hrang hrangah ram kang thleng nasa

Kum dang ang bawkin, kuminah ram hrang hrangten ram kang an tuar leh a, ram ngaw zau tak kang ralin, mi tam takin nunna an chan a, chenna in sang tel a kang chhe leh bawk a ni.

European Space Agency chuan, kumtinin ram kang hian ram square kilometer maktaduai li vela zau a nghawng ṭhin niin a sawi. Hei hi US ram zahve tiat vel leh, Nigeria ram let li vel zeta zau a ni. Heng ram kangin a nghawngte tehna atan hian scientist-te chuan low Earth-orbit satellite te hmangin, Corpernicus Sentinel-3 pawh an hmang tel. Shortwave-infrared data leh tehnique hrang hrang data lakkhawmte an hmang ṭhin a ni.

Ram kang a pung
Ram kang thleng ṭhin hi leilung pianken pakhat ni ve mah se, scientist-te chuan a kum telin ram kang hi a thleng tamin a huam chin pawh a zau zel niin an sawi.

UN-in report a tihchhuahah chuan hetianga ram kang a tam chhoh zel chhan hi mihringte thiltih vang, sik leh sa inthlak danglam nasat tak vang niin a puh. Ram hrang hrang scientist-te chuan khawvelin extreme weather a la hmachhawn chho zel dawn a, sea level sang zel leh Artic ice tuiralin a nghawngte chu mihringten an la tuar zel dawn tih an sawi.

Australia-a University of New South Wales-a associate professor, Mark Diesendor chuan climate change hian thli lum leh ro a siam nasa a, hei hian thlai leh thing tiroin, kangmei chhuak pawh kangkai chakin ram zau tak a kan phah ṭhin a ni, a ti.

Center for Research on the Epidemiology of Disasters chuan kum 1911 aṭang khan ram kang nasa tak, mi 10 aia tam an thih phahna hi khawvelah ṭum 470 vel a thleng tawh niin a sawi. Heng kangmei chhuakin an kan chhiat hlut zawng hi USD tluklehdingawn 120 hu an tling tawh bawk.

Turkey
Turkey ram chhim lama ram kang vangin July 28 hnu lamah mi pariatin nunna an chan tawh. President Recep Tayyop Erdogan chuan kangmei chhuakin a nghawng bialte chu 'disaster area' ah a puang a, an ramin ram kang a tawrh tawha la nasa ber a nih thu a sawi.

Turkish Foresters Association vice-chair, Husev Ozkara chuan kum 10 liam ta chhung khan an ramah kumtin ram kang hi ṭum 2,600 vel thleng ziah ang a nih thu sawiin, kum 2020-ah chuan ṭum 3,400 dawn a thleng a ni, a ti.

California Dixie Fire
US-a California state hian kumtin ram kang an tuar a, kuminah pawh July thla laihawl aṭang khan ram kang, Dixie Fire tia an vuah chu an tuar leh a ni. Thuneitute chuan kangmei chhuak hi ram hectare 253,637 vela zauah a darh niin an sawi. Mi sang tel chu hmun him lamah sawnchhuah an ni a, structure 1,200 chuang a kang chhe bawk.

Dixie Fire hi California-a ram kang thlen tawh zinga a nasa ber dawt niin, nikuma August Complex fire kha ram kang an la tawrh nasat ber a ni. Ram hectare 404,685-a zau a kang chhia a ni.

France
France chhim lamah pawh ram a kang nasa a, Saint-Tropez bulah ram kang vangin mi pahnih an thi. Tun ṭuma ram kang hi France rama nipui lama ram kang thleng nasa ber nia sawi a ni a, ni nga chhung kangmei chhuak hi an ṭhelh hnuah kar liam ta Zirtawpni khan hmun dangah a kan kai belh tawh loh thu kangṭhelhtute chuan an sawi.

Kangmei chhuak hian ram ngaw hectare 7,100-a zau a kang chhe hman a ni. Kangṭhelh hna hi firefighter 1,200 leh fire engine 250 hmanga thawh a ni.

Siberia Wildfire
Russia rama hmun vawt ber, Siberia bialah pawh ram ngaw zau tak chu thunun theih lohin a kang chhe bawk.

Greenpeace Russia forestry head, Alexey Yaroshenko chuan kangmei chhuahna zinga a nasa berah ram hectare maktaduai 1.5 chuanga zauah a ni tih sawiin, hei hi la darh zelin an ram chanchina ram kang a thlen nasat ber ṭum tih a sawi. Washington Post chuan Siberia rama ram kang hi khawvel hmun dang zawng ram kang belhkhawm aiin a zau zawk niin a tarlang.

Centre for Research on the Epidemiology of Disasters chuan kum 1911 aṭang khan khawvel ram hrang hranga ram kang vangin mi 4,545 in nunna an chan tawh a, mi dang 11,379 in hliam tuarin, mi maktaduai 17 chuang chu a nghawng tawh tih a tarlang. Minnesota-a kum 1918-a Cloquet fire kha khawvel chanchina ram kang rapthlak ber nia record a ni a, thi leh chin hriat loha awm mi 1,000 vel an awm.

Greece
Greece ramah chuan an ram khawpui, Athens bakah Evia, Peloponnese leh Attica-ah hmun 500 chuangah ram a kang a, mi sang tel hmun him lamah thiar chhuah an ngai. Ram kang vang hian mi pahnih an thih tawh bakah hliam tuar mi 20 vel an awm bawk.

Prime minister Kyriakos Mitsotakis chuan Greece rama ram kang nasa tak chu climate change-in a thlen a ni, a ti.

Italy
Italy rama Sicily leh Calbaria bial chhim lama hmun 500 chuangah ram a kang a, mi pahnih an thih phah bawk.

August 12 khan Sicily temperature hi 48.8C niin, hei hi Europe ram pumah pawh khaw lum ber ṭum niin scientist-te chuan an sawi. Italy hian Mediterranean heatwave a dawn avangin ram kang hi a thlen nia ngaih a ni.

Lebanon
July thla tawp lam khan Lebanon hmarlama Akkar ramngaw chu nasa takin a kang a, kangṭhelhtute puitu tleirawl pakhat chu a thi a ni. Ram kang vang hian mi tam tak chu an in chhuahsanin hmun him lamah an tlanchhuak a ni. Ram kang zau zawng tak hi hriatchian a la ni lo a, sorkarin kangṭhelhna tur aircraft a neih loh avangin Cyprus, Greece leh Syhria ramten an pui.

Algeria
Algeria ramah chuan kuminah ram kang vangin mi 90 vel an thi tawh a, an zingah hian sipai 33 an tel.

President Abdelmadjid Tebboune chuan ram pumah ram kanga thite hriatrengna leh sunna ni thum chhung a puang. Kumina ram kang hi an rama ram kang thleng nasa ber a ni tih sawiin, thuneitute chuan ram kan chhan hi misual ṭhenkhatte hal vanga ram kang hi thleng niin an sawi a, pawikhawihtua puh mi eng emaw zat man an ni tawh.

Jerusalem
Israel khawpui, Jerusalem bula ram ngaw chu kar liam ta khan kangin, hriat theih chinah a kan nasat ber ṭum niin an sawi.

Israel Fire and Rescue Service chuan firefighting team 110-ten aircraft pariat hmangin ni thum chhung theihtawp chhuahin ram kang hi an ṭhelh tih a sawi a, ram kanna hmun hi square km 20-a zau a nih thu a sawi. Mei khuin Jerusalem khawpui pawh a bawh nasa hle a, hei vang hian naupang leh nu, naupai laite chu pawn chhuak lo turin ngen an ni hial. Ram kang hi Mediterranean basin-ah pawh a thleng a, Spain, Portugal leh Morocco-te pawhin an tuar a ni.

Mediterranean Wilfire
Kuminah Europe chhim lam, Africa lam aṭanga boruak lum dawngtu zingah ram a kang nasa hle a, Algeria aṭanga Jerusalem thlengin thla hmasa khan hmun tam takah ram kang hi an tuar a ni.