Mi zawng zawng kan ngaidam vek, Ghani leh Saleh pawh an lo let thei ang : Taliban Hotu

Afghanistan-a roreltu thar, Taliban pawl chuan mi zawng zawng an ngaihdam thu sawiin, ram danga tlanchhe mek Afghan president Ashraf Ghani leh vice president Amrullah Saleh pawh an ngaidam a, an duh a nih chuan Afghanistan ramah an let thei ang tih an sawi.

Geo News-in an kawmnaah Taliban senior leader Khalil ur Rahman Haqqani chuan Ghani, Saleh leh National Security Advisor Hamdullah Mobil leh an pawl inkarah inhmelmakna a awm lo thu a sawi. An inhmuhthiam lohna awm chu sakhaw thil zawk a ni tih a sawi bawk.

Haqqani chuan mipuite chu an ram chhuahsan lo tura ngenin, an hmelmaten phuba la tur anga an sawina chu thu belhchian dawl lo a nih thu a sawi. "Mi zawng zawng kan ngaidam vek a ni, indonaa min beitu general aṭanga mipui nawlpui thlengin kan ngaidam vek," a ti. "Tajiks, Balochs, Hazaras leh Pashtuns te chu kan unau vek an ni" tiin a sawi.

Taliban-te chu US laka indona chawkchhuaktu an nih loh thu sawiin, Haqqani chuan an pawl hian an hnam zia, sakhua leh an ram venhim tumna vang chauha US dolet an nih thu a sawi bawk. "America zawk chuan kan ram ngeiah, kan lakah ralthuam an che lek zawk a ni," tiin indonaa hnehna an chan theihnan Pathian chuan Taliban-te chu America ralthuam a pe a ni, a ti.

US, NATO leh ram dangten an thlawp Afghanistan sipai 3,50,000-te lakah Taliban chuan hnehna ropui tak a chang ta a ni tiin, Haqqani chuan Muslim ram zawng zawngte chu inpumkhata awmtir chu Taliban chuan a duh a ni, tiin a sawi. Ram hrang hrangte pawh a mi leh sate chu an dikna chanvo ṭheuh pe tura phutin, Afghanistan-ah chuan sorkar huamzau zawk siam a ni dawn a, min rintlak leh mi thiam tak takte'n Afghanistan sorkar thar an siam dawn tih a tiam. Mipuite pumkhata siam theite chu sorkar tharah hian telh an ni dawn tih a sawi bawk.

Sorkar tharah hian Afghanistan-a pawl awm zawng zawng aiawhte chu an tel tur thu sawiin mi hrang hrang pawhin Taliban chu an thawhpui tur thu pawh a sawi tawh a ni, a ti.