China-ah July hnuah tualchhungah Covid inkaidarh awm lo

China health authority te chuan nimin khan July thla hnuah a vawi khatna atan tualchhungah Covid-19 hri inkaidarh an awm lo tih sawiin, hri leng mek chuan ziaawm lam a pan chho zel dawn niin an sawi.

Hri inkaidarhna thlen thar lehna chu July 20 kha niin, Nanjing khawpui chhak lama airport-a thawktu ṭhenkhatte aṭanga hmuhchhuah an ni. Hemi hnu hian China-a mi 1,200 chuang te chuan hri hi an kai leh tawh tih hriatchhuah a ni. Hri darh leh vang hian tualchhunga thuneitute chuan khuahkhirhna dan an kalpui nghal a, mi maktaduai chuangte chu mass testing an neihsak bakah inkhunghranna hmun leh hri kai enkawlna turte an siam thar leh nghal bawk.

Hri leng thar leh hi August thla tir lam khan a peak thlengin hemi hnu hian tualchhunga hri kai pawh an tlahniam nghal a, kar liam ta khan hri kai thar hi singe-digit-ah a tla thla leh tawh a ni.

Kar hmasa chhung vek khan airport pahnih aṭangin cargo worker zingah hri kai an awm avangin Shanghai chuan mi za chuang a khunghrang a, khawpui chhungah hri a darh leh hlauhthawnna a lian chho leh hle a ni. Mahse nimin thleng chuan Shanghai-ah hian hri kai thar an la awm leh lo.

National Health Commission chuan nimin khan hri kai thar mi 21 awmin, August 22-ah khan mi 32 an awm bawk tih a sawi.

Pathianni thleng khan mainland China-ah chuan Covid-19 kai hmuhchhuah tawh mi 94,652 leh thihpui mi 4,636 an awm a, kumin January thla aṭang khan a la ngai reng a ni.