SKorea-in NKorea-a palai kal tur ruat

South Korea President Moon Jae-in chuan North Korea-a special envoy atan security official pahnih a ruat.

National Intelligence Service (NIS) hotu Suh Hoon leh National Security Office (NSo) hotu Chung Eui-yong-te chu SKorea aiawhten North an tlawh turah an ho dawn a, North Korea aiawhte nen Korean peninsula-a boruak ṭha leh muanawm zawk a awm theih dan tur te, NKorea leh US ten inbiakna an neih theih dan turte pawh an sawiho rin a ni.

Hetih lai hian US leh South Korea hian joint military drill neih an tum mek a, hei hi North lam chuan a sawisel nasa hle. SKorea leh US hian joint military drill an neih tur hi South Korea-a Winter Olympics leh Paralympics neih a nih vangin a sawnhla a, April thla tirah an nei dawn a ni.

North Korea chuan US nena inbiakna neihna tur kawng a inhawng niin Inrinni khan a sawi nawn leh a, mahse intiamkamna nena inbiakna neih erawh chu a tum lo tih a sawi. NKorea foreign ministry thupuangtu chuan inbiakna neihna turin kawng inhawng mah se, US hi an ngen hmasak loh tur thu a sawi.