Congo-a tharum thawhna thlengah mi 100 thi tawh

Congro ram hmarchhak lam, Ituri province-ah Hema leh Lendu hnam inkara buaina chhuak thar lehah mi 33 an thi a, nikum December thla aṭang khan he biala buaina chhuak vang hian mi 100 chuang an thi tawh a ni.

Hema bawngvulhtute leh Lendu loneitute inkarah hun rei tak buaina a chhuak tawh a, hei vang hian mi tam tak chu Ituri bial aṭang hian an tlanchhe tawh a ni. Kum hnih kalta chhung khan tualchhung buaina chhuak vang hian mi nuai hnih vel chu hmun dangah an tlanchhe tawh nia sawi a ni.

Hema leh Lendu-te hi ram neitu zawk nih inchuhin kum 1997-2003 inkar khan nasa taka inbeiin, mi sang tel an lo thi tawh a ni. He indo hi ramdangte chuan Africa's world war tiin an sawi hial a, ramdang eng emaw zat pawh an inrawlh nia sawi a ni. He indona hian tualchhung mi maktaduai ruk zet tan harsatna thlenin, tam tak chu indonaa an thih bakah, natna leh ei tur ṭha neih loh vangin mi tam takin harsatna an tawk zui a ni.

United Nations children's agency, UNICEF chuan Congo tualchhung buaina vang hian naupang 46,000 chuang tlanchhe zingah an tel niin a sawi. Norwegian Refugee Council chuan Congo mipui maktaduai 4.5 ve chu chhawmdawl ngaiin an awm mek niin a sawi.