Merkel-i kaihhruai tangrual sorkar ding leh dawn

Germany eptu pawl Social Democrats (SPD) chuan ṭangrual sorkar siam a remtih tak avangin German Chancellor Angela Merkel-i chuan a ṭum li-na atan ṭangrual sorkar a siam leh thei dawn ta a ni.

Nikum September thlaa inthlanpui neihah party mala sorkar siam thei an awm lo a,

ṭangrual sorkar siam tura inremna an siam mai theih loh avangin hun rei tak politics buaina an tawh phah a ni.

SPD hi ṭangrual sorkara tel leh tel loh chungchang an ngaihdan a phir a, hruaitu lamten tel an duh laiin, ṭhalai pawl lamn an duh lo thung a ni. Mahse vote an laknaah member 60% chuan ṭangrual sorkara tel hi an duh ta zawk a ni.

Kum 12 zet sorkarna lo siam tawh, Merkel-i chuan SPD-in thutlukna an siam ta chu lawmawm a tih thu a sawi a, an ram tana theihtawp chhuaha thawhpui an nghakhlel tawh hle tih a sawi.

Nikum inthlanpui neihah khan Merkel-i party, Christian Democrats (CDU/CSU) a che ṭha lo hle a, seat 65 zet a hloh a ni. Free Democrats (FDP) leh Greens nena ṭangrual sorkar siam a tumna chu a hlawhchham hnuah, Social Democrats nen an thawkdun dawn ta a ni. Ṭangrual sorkara an tel dawn avangin Social Democrats hian minister post paruk a chang dawn a, finance ministry pawh an chang tel dawn a ni. SDP hian minister turte hi a ruatfel thuai rin a ni bawk.