Turkey-a US embassy khar

Turkey khawpui, Ankara-a US embassy chu security lam venthawn thilah nimin khan khar a ni.

Embassy chuan Pathianni khan an website-ah thuchhuah siamin, US mite chu Ankara-a US embassy chu tlawh lo tur leh, mipui pawh a chhehvela pungkhawm lo turin a hrilh a ni. Embassy chu security lam venthawn thilah khar ani dawn a, hawn a nih hun tur chu a puang leh mai dawn niin a sawi. Khar a nihna chhan hi chiang takin tarlan a ni lo a, mahse embassy leh US mite chu beih tum an ni thut thei niin an sawi.

Kum 2013 khan Ankara-a US embassy kawtah hian thihchilh bomb tihpuah alo ni tawh a, Turkish guard pakhat a thi tel a ni. Turkey official-te chuan he pawikhawihna hi tualchhunga helte thiltih niin an sawi.

Turkey leh US inkar boruak hi a chhe fo a, a bikin Turkey-in firfiak pawla a puan, Syria hmarlama Kurdish People's Protection Units (YPG)-te chu US hian a thuam chak avangin an inkar boruak pawh a nghawng phah a ni. Turkey hian kumin January 20 aṭang khan a ramri bul, Syria hmarthlang lama YPG awmna bialah hian beihpui an thlak a, US chu YPG-te a thawhpuina titawp turin a phut fo a ni.