Kim Jong-un-a'n SKorea palaite hmu Korea ramte inzawmna ṭha zawk siam duh

North Korea hotu lu ber, Kim Jong-un chuan an ram tlawha kal, South Korea palaite chu hmuin zanriah a lo buatsaih sak. Kim chuan Korea ram pahnihten inzawmna ṭha zawk an neih a duh thu a sawi a ni.

South Korea President Moon Jae-in-a tirh official-te hian Thawhṭanni khan NKorea hi an thleng a, NKorea hotu atana Kim dah a nih hnua SKorea official-ten an tlawh hmasakna ber a ni. SKorea palaite hian tun kar tawp lam hian US tlawhin, North nena inbiakna neih dante hi US official-te an hrilh ve leh dawn a ni.

Kum 2011-a North Korea ram hotu lu ber atana lakluh a nih hnu khan Kim hian foreign official-te ala hmu tam lo hle a, SKorea palai-ten NKorea an tlawh hnuhnun ber chu kum 2007 daih tawhah khan a ni.

Thawhṭanni-a NKorea tlawhtu, SKorea palai zingah hian intelligence chief Suh Hoon leh National Security Adviser Chun Eui-yong-te pawh an tel. SKorea-a Winter Olympics neih zawh taka Korea ram pahnih aiawh infiammite flag pakhat hnuaia an kal hnuah, ram pahnihten inzawmna leh inpawhna ṭha zawk an neih theih dan ngaihtuah tura zin an ni.

North Korea official news agency, KCNA chuan Kim hian SKorea palaite hi lawm taka lo dawngsawngin, inhawng takin inbiakna pawh a lo neihpui niin a tarlang. Palaite hian SKorea President Moon-an inbiakna neih chhunzawm pui zel tura sawmna lehkha a thawn pawh Kim hian pe a ni.

SKorea palaite puala zanriah buatsaihah hian mipui hmuha inlan khat tak, Kim-a nupui Ri Sol-ju pawh a tel a, Winter Olympics chhima kal NKorea palaite zinga mi Kim-a farnu Kim Yo-jong pawh a tel bawk.