Sri Lanka-in emergency a puang

Sri Lanka-a Kandy district-a Buddhist leh Muslim inkara buaina nasa tak a chhuah avangin nimin khan sorkar chuan ni 10 chhung atan emergency a puang.

Sri Lanka ramah hian Buddhist leh Muslim-te hi an intibuai fo a, Buddhist kalfawr pawlte chuan Muslim mite chu Islam sakhuaa inlet tura midangte tiluiah an puh a, hei bakah hian Buddhist hmun pawimawhte an suasam sak fo niin an puh a ni. Buddhist-te hian an rama Rohingya Muslim tam tak tlanchhe lut pawh an ngaimawh hle bawk. Sri Lanka mipui maktaduai 21 zinga 9% vel chu Muslim niin, Buddhist hi 70% vel an ni thung.

Kandy district-a buaina hi Pathianni-a inṭan a ni. Sinhalese Buddhist hnam ami truck driver pakhat chu Muslim mi pali nena an intihbuai hnuah a thi a, Pathianni khan vui a ni. Vui a nih hnu hian Buddhist-te chuan Muslim dawrte an suasam a, an inte an halsak bawk. In an hal pakhatah hian Muslim tlangval pakhat ruang hmuh a ni. Thawhṭanni khan buaina thlenna hmunah hian sorkar chuan sipai leh police te a tir a, curfew a puang zui nghal a ni.