Chhawmdawl hna thawktuten Eastern Ghouta chhuahsan
Syria-a helho kuta awm mek, Eastern Ghouta biala mipuite chhawmdawl hna thawktu, UN refugee agency-te chuan he khuaa an hnathawh hun chu titawiin an chhuahsan.
UN refugee agency official chuan UN convy hian February thla laihawl aṭang khan chhawmdawlna hi semin, truck 40 chuang zinga 10 ami chu an sem zo hman lo niin an sawi.
Eastern Ghouta-ah hian Thawhṭanni khan darkar nga inkahhai puan a ni chungin Syria sipaite chuan beihpui an thlak chhunzawm leh a, civil mi tam tak an thi niin activist-te chuan an sawi. Tun hnaia sipaite beihpui thlakna avang hian mi 719 an thi a, an zingah hian naupang tam tak an tel nia sawi a ni.
UNHCR Syria representative Sajjad Malik chuan sipai leh helte inbeihna karah theihtawp chhuahin mipuite chhawmdawl hna hi an thawk tih a sawi a, he khawpuia civil mite dinhmun chu a ṭha lo hle niin a sawi bawk.
Syrian Red Crescent chuan Easter Ghouta biala cheng mipuite chhawmdawlna tur ei tur, truck 46-a phurhluh chu mi 27,500 hnenah sem a ni tih a sawi a, Douma khuaa mi 70,000 hnenah health item sem a ni bawk tih a sawi.
Syria leh a thurualpui te chuan Eastern Ghouta bial hmun thuma ṭhena hmun khat chu helho kut aṭangin a la let tawh tih an sawi.