Taliban-in Aug 31 deadline pawtsei lo turin US a vau

Taliban firfiakte chuan US-in Afghanistan aṭanga America sipaite lakchhuah hun tura a lo ruat tawh, August 31 chu pawtsei lo turin a ti a, an pawtsei a nih chuan a nghawng an tuar ngei dawn tiin an vau.

Taliban thupuangtu, Dr Suhail Shaheen chuan tun thla tawpa inla chhuak fel tura an lo inrem tawh angin, hemi bak an awm zui a nih chuan an ram an luahsak a ni dawn tih a sawi. US leh UK-in deadline hi an pawtsei a nih chuan nghawng na tak a awm tur thu a sawi.

Shaheen chuan US leh UK-in an mi leh sate lakchhuah chhuanlama hmanga hun pawhsei an dil a nih chuan an chhanna chu 'Remti lo' a ni tih sawiin, hei hian an inrintawnna pawh a tichhe dawn a ni, a ti.

Hetih lai hian US legislator-te chuan America mite leh an thawhpuite lakchhuah hna thawh mekah, thil ṭha lo thlen thei laka veng tura hma la turin President Joe Biden chu an nawr ve reng a, Kabul airport-ah venhim hna an thawh pawh an chhunzawm theihna turin August 31 deadline chu pawtsei turin an nawr a ni.

Aghanistan chung­chang ngaihtuahin nimin khan Group of Seven - Canada, France, Germany, Italy, Japan, US leh UK chuan emergency meeting an nei. Meeting-ah hian US hi August 31 deadline pawtsei tura nawr an tum thung. Taliban sorkar siam tur chu an pawmpui dawn nge, hrekna na tak siam ani dawn tih pawh an sawiho a ni.

Taliban-ten thuneihna an chan hnuah Afghanis­tan chhuahsan tuma Kabul airport-a mi tam tak kalkhawm chungchang chu an hlauh vang a ni lo tih Taliban thupuangtu chuan a sawi. "Khawthlang ramah awm an duh vang zawk a ni. Afghanistan chu ram theite tak a ni a, a mi cheng zinga 70% chu line of poverty hnuai lam niin, hei vang hian dinhmun ṭha zawk beiseiin khawthlang ram pan an tum a ni. Hlauh vanga tlanchhiat tum an ni lo," a ti.

Sorkar hmasa hnuaia lo thawkte dap chhuah hna thawh mek nia sawi pawh thu dik lo a nih thu Shaheen chuan a sawi bawk. "Kan hmelmate chuan thu dik tawk lo an thehdarh nasa a ni," tiin Taliban rorelna hnuaiah hmeichhiate chuan hijab an hman chhung chu hmun danga dikna chanvo an neih ang bawk an nei dawn tih a sawi. Thuneihna an chan hnuah hmeichhaite chuan an hna an thawh chhuznawm a, hmeichhe journalist-te pawh an hna ngai an la thawk reng a, engmah an chan lo tih a sawi.

Ukraine thlawhtheihna hijack
Ukraine sorkarin Aghanistan-a an mi leh sa awmte hruai hawna tura a tirh, thlawhtheihna chu mi tu tih hriat lohten an hijack a,Iran lamah an hruai kawi tih Ukraine deputy foreign minister Yevgeny Yenin chuan a sawi.

News agency TASS-in a report danin, he thlawhtheihna hian Ukraine mite phur loin, midang phurin Iran a pan niin a sawi. Minister chuan thlawhtheihna hijack-tute hian ralthuam pawh an nei tih a sawi bawk.

Hetih lai hian Iran aviation thupuangtu chuan Ukraine thlawh­theihna hijack Iran ramah an thlawhpui nia sawi chu thu dik lo niin a sawi ve thung.