Israel-in Gaza Strip-a Hamas-te hmun a bomb
Israel sipaite chuan Thawhṭannia Gaza Strip aṭanga an ram chhim lama air balloon chhuah a nih avangin Gaza-a Hamas ho hmun chu nimin zing khan indo thlawhtheihna hmangin an bomb zui ve nghal.
Hamas ho hmun an bomb hi ralthuam an siamna leh rocket an kahchhuahna hmun a ni a, thi leh hliam an awm lo nia sawi a ni.
May thlaa Israel-Hamas-ten ni 11 an indona titawpa inkahhai an puan hnuah, Gaza aṭang hian Palestinian pawl lam hian Israel-ah air balloon an chhuah leh fo a, hei hian Israel chhim lamah kangmeite a tihchhuah phah a ni. Thawhṭannia balloon an chhuah pawh hian Israel ram leilet, Gaza ramri bulah kangmei a tichhuak niin Israel Fire and Rescue Service chuan a tarlang. Palestinian-te chuan air balloon an chhuah chu Israel-in Gaza khuahkhirhna thlahdul tirna tur leh, chhawmdawlnate an luh phalsak tura an nawrna niin an sawi.
Israel hian kar liam ta khan Gaza-ah chhawmdawlnate luhtir chhunzawm an ni dawn tih puang mah se, ramriah buaina a chhuak leh fo a ni. Inrinni liam ta pawh khan ramri-a motor ke hal leh, puak thei thilte an vawm avangin Israel sipaite chuan pungkhawmte hnawhdarh nan silai an hmetpuak a, Palestinian mi 41-in hliam an tuar. An zinga pahnih chu an dinhmun a ṭha lo hle nia sawi a ni. Palestinian-te silai hmehpuahah Israel sipai pakhatin hliam na tak a tuar ve bawk.
Hemi hma pawh hian Gaza aṭang hian Palestinian pawlte hian Israel beihna turin rocket an kapchhuak a, mahse hei hi Iran Dome anti-missile system hmangin Israel chuan a lo kap thla a ni. May 21-a inkahhai an puan hnua Gaza aṭanga rocket hmanga Israel beih a nih lehna hmasa ber a ni.
May thlaa an inbeihnaah khan Palestinian mi 250 chuang leh Israel mi 13 an thi a ni. Israel hian Gaza luhkate a la dang chat a, Gaza-a cheng Palestinian mi maktaduai hnih vel chu khuahkhirhna khauh tak hnuaihah an awm a ni. Egypt pawhin Gaza nena an inrinaah khuahkhirhna a siam bawk.