Taliban-in hmeichhia hnathawkte in lama awm rih turin ti
Afghanistan rama thuneitu thar, Taliban firfiak pawl thupuangtu Zabihullah Mujahid chuan Thawhlehnia chanchinthar lakhawmtute a kawmnaah, sorkar hnuaia thawk hmeichhiate chu fimkhur thilah in lamah awm rih turin a ti a, an hnaa an kir leh theihna turin an pawl chuan hma an la mek tih a sawi bawk.
Muajahid chuan venhimna mumal tak an neih hma chuan Afghan hmeichhiate chu an in lamah hun rei vak lo chhung chu an himna atan an awm a ngai dawn a ni,a ti.
Sorkar an siam hmasaka an chet dan thlirin, hmeichhiate zalenna an rahbeh sak leh hlauhthawnna a lian hle a, hetihlai hian Taliban chuan sorkar an siam thar chu huamzau zawk leh, hmeichhiate dikna chanvo pawh zahsak an nih tur thu an sawi thung. Sharia law hnuaiah an zalenna an hmang thei dawn a, hna thawh leh lehkha zir pawh khapsak an ni dawn lo tihte an sawi a ni. Mahse hetianga an sawi chung hian an thusawi hi a takina an kalpui ngei dawn em tih rinhlelhna a la lian hle.
United Nations human rights chief Michelle Bachelet chuan Taliban ten hmeichhiate leh hmeichhe naupang an enkawl dan chu a hleihluak hle niin a sawi.
Kum 1996-2001 inkara Talibante'n rorelna an chan chhung khan hmeichhiate hi hnathawh phalsak an ni lo a, an hmai tuam reng tura tih an nih bakah in an chhuahsan duh a nih chuan an laina hnai mipate'n an chhuahpui a ngai ṭhin a ni.
Taliban thupuangtu Zabihullah Mujahid chuan phuba lak tumna an nei lo tih sawiin, hmeichhiate chu Islamin law nen a inrem phawt chuan hna thawh phlasak an ni dawn tih a sawi. Mahse hetichung hian inchhung indap sak te, hmeichhiate an hnathawhna aṭanga chhuahtir te , security official hluite leh hnam bil tlem zawk te laka phuba lakna thawm hriat tur awm fo chuan mipuite a tihlauthawng hle. Mahse Taliban chuan heng hi a dik lo nia sawiin, thil dik lo thleng nia report awm chu chhui chian zel an tiam.