G7 ram hruaitute'n mipui huap sorkar din turin Afghan party-te ngen

Group of Seven, G7 ram hruaitute chuan Afghanistan-a party awm zawng zawngte chu mipui aiawh zo leh huapzo tur, hmeichhia leh hnam bil tlem zawk tel theihna sorkar din turin an ngen.

G7 ram hruaitute hian Thawhlehni khan virtual meeting hmangin Afghanistan ram dinhmun hi an sawiho a ni.

Ram hruaitute chuan Afghanistan ram chhunga pawikhawihna thlengte chu lungrual taka beihho an tiam tih sawiin, "Afghanistan chu mi rikraptute zalen taka an awmna hmun a ni tawh tur a ni lo," an ti.

Afghan sorkar thar ding tur chu pawikhawihna thleng thei laka venhimna kalpui tur leh Afghan mipuite dikna, a bikin hmeichhia, naupang leh hnam leh sakhaw bil vawnhim sak tura ngenin, eng dinhmunah pawh ding se International human rights law zulzuia kalpui zel turin an ngen.

G7 ram hruaitute chuan Taliban thuhnuaia awm Afghanistan chu an ngaihtuah thu leh Afganistan mipuite tan an din zel tur thu an sawi bawk.

"An boruak tawn mek vangin Afghanistan mipui te kan ngaihtuah takzet a, dinhmun harsa taka dingte leh ram pawn miten harsatna an tawh lohna tur leh,boruak muanawm a awm theihna tura hma la turin kan ngen a ni," an ti. Ram hruaitute chuan "Tuna kan tum bulpui ber chu himdam taka ram mipui leh Afghan rama kan thawhpuite hruaichhuah a, kum 20 liamta chhunga kan hnathawhnaa min puitute puihlet a ni" a ti.

"Theihtawpin kan buaipui chhun­zawm zel dawn a, midangte pawh min thawhpui turin kan beisei bawk a ni. Humanitarian, medical personnel leh international service provider-te himna kan ngaihtuah a, hemi atan hian kan thawkho zel dawn a ni. Afghanistan ram ṭhenawm, raltlante lo dawngsawntute nen chuan an khawsak zel dan tur pawh kan ngaihtuah pui dawn a ni," tiin an sawi.