Kabul Airport chhuahsan turin mipuite ngen

US leh a thawhpui ram dangte chuan Islamic State (IS) firfiak pawlin pawikhawihna an thlen hlauhthawnna avangin Kabul Airport-a awmte chu an awmna hmun chhuahsan thuai turin an chah.

Taliban-ten Afghanistan-a thuneihna an chan hnuah tlanchhuah tumin mi tam tak chu Kabul airport-ah an la awmkhawm reng a ni.

Mahse Nilaini zan khan Kabul-a US embassy chuan thuchhuah siamin, security thil avangin airport-a kal lo turin mipuite a chah bakah, airport gate bula awmte pawh an awmna hi chhuahsan thuai turin a ti. Britain pawhin an mi leh sate chu airport pan lo turin a chah ve nghal a, firfiakte chetna thleng thei reng a ni tih sawiin hmun him lam pan turin a ti. Australia pawhin airport chhuahsan thuai turin an mite a chah bawk.

Airport-ah hian Afghanistan chhuahsan tumte puiin khawthlang ram sipaite an la duty zel a, hetihlai hian airport pawn lamah hian Taliban-te an duty ve bawk.

Afghan civil aviation official chuan firfiakten an beih a hlauhawm thu warning tihchhuah a nih hnuah pawh mi tam tak chu airport gate bulah an la awmkhawm reng tho niin a sawi. "Mi tam tak awmkhawmna hmun hi thihchilh bomb tipuaktute tan beih awlsam tak a ni a, hei vang hian warning pawh tihchhuah reng a ni," a ti. Mahse airport-a awmte chuan an kalsan duh chuang lo a, Aghanistan ram chhuahsan theih beiseiin an nunna thapin, thih pawh hlau loin an awm chhunzawm reng a ni, tiin a sawi.

Kabul-a NATO palai chuan Taliban-te chuan airport pawn lam chu veng mah se, Islamic State (IS) te an chet hlauhna a awm reng tih sawiin, hei hi ngaihthah mai chi a nih loh thu a sawi a ni.

Taliban-ten thuneihna an chan aṭanga ni 11 hnu, Ningani thleng khan US leh ram dangte chuan Afghanistan aṭangin mi 88,000 an hruai chhuak tawh.

US-in a ṭul chen chen awm zui a tum
US president Joe Biden chuan Afghanistan ram aṭanga American leh ram dang mite lakchhuah hna thawhah deadline a awm lo tih sawiin, a ṭul chen chen awm zui an tum tih a sawi.

Biden hian America sipaite chu August 31-a lakchhuah kim vek a lo tiam tawh a, mahse mipuite ṭanpui hna thawh a ngaih avangin a hun tiam hi pawtsei turin a nawr a ni.

Hetih lai hian Taliban chuan inremna an lo siam tawh angin August 31 hmain ram dang sipaite chu an ram aṭanga chhuak vek turin an ti thung. Ram dang sipaite an chhuah kim huna airport-a hawn chhunzawm zel a nih theihna atan NATO member, Turkey ram puihna an ngen bawk. Turkey chuan technical expert-te an awm chhunzawm dawn niin a sawi.