Gaza Strip-ah Palestinian-ten lungawi lohna lantir chhunzawm

Palestinian-te Israelin kawngpui a dan chahsak chu titawp tura phutin, Gaza Strip chhim lama Israel sipaite inkhuarna bulah lungawi lohna an lantir.

Nawrh an huaihawt dawn avang hian Israel chuan Nilaini khan sipai tam zawk a tir lut a, Gaza chhimlama nawrh huaihawtte hnawhdarh nan hian tear gas leh live fire an hmang. Palestinian medics chuan mi pakua velin hliam an tuar niin a tarlang.

Hamas enkawlna hnuaia awm, Al Aqsa TV television network chuan indaidanna bula mipui pungkhawmte, Israel sipai motor a thlen hnua an tlanchhiat lai leh sipaiten tear gas-a an phuh lai thlate an tichhuak a ni.

Inrinni liam ta khan Palestinian-te hian nawrh huaihawtin buaina nasa tak a lo chhuak tawh bawk a, Israel sipaite silai hmehpuahah Palestinian mi 40 chuangin hliam an tuar. An zingah hian naupang kum 13 mi pawh a tel a, a luah kah fuh anih thu Hamas health ministry chuan a sawi. Hliam tuar zinga pakhat, kum 32 mi Osama Dueji chu Nilaini khan a hliam tuar loin a thi. He mi ṭuma buaina chhakah hian Israel sipai pawh a luah kah fuh niin hliam na tak a tuar a, damdawi-inah enkawl mek a ni.

Israel-in Gaza Strip kawngpui a dansak titawp tura nawrna atan Hamas-te hian nawrh hi an huaihawt a ni. Kum 2007-a Hamas-ten Gaza-a thuneihna an chan aṭang khan Israel leh Egypt hian Gaza Strip kalpawhna an la dan sak reng a ni. Israel chuan hei hi Hamas-ten ralthuam leh an inthuam chakna tur hmanrua an lakluh tur venna atana ti a nih thu a sawi.

Blockade kalpui vang hian Gaza economy pawh a tlachhe sawt hle a, hna hmu lo hi 50% velin an pung tawh.

Kum 2007 aṭang khan Israel leh Hamas-te hi vawi tam tak inhmuthiam loin, ṭum li an indo tawh. Kumin May thla khan ni 11 chhung inbei lehin, Palestinian 260 leh Israel mi 13 an thi a ni. Mahse ni 11 hnuah indona titawp a, inkahhai puan an remti thei ta a ni.

Hamas chuan Israel-in Gaza-a blockade khauh zawka a kalpui leh avangin inremna an lo siam bawhchhiaah a puh. Israel hian kar hmasa khan Gaza-a chengte chhawmdawlna pek luhna turin Qatar ram chu inremna a siampui a, mahse an inremna siamah hian chhamdawlnate chu UN-in dawng tura Israel-in a thlan chhungkuate hnenah a pe ang. A hma chuan Palestinian-te chhawmdawlna tur pawisa pekte chu Hamas-te kutah hian pek hmasak phawt a ni ṭhin.