Kabul Airport-a bomb puakah mi 110 an thi : Thi zingah US sipai 13 an tel

Afghanistan khawpui, Kabul-a airport-ah mipui awmkhawmte chu Ningani zan khan firfiakten silai nena beiin thihchilh bomb pahnih an tipuak bawk a, mi 110 an thi. Thi zingah hian US sipai 13 an tel.

Bomb puakah hian Afghan mi 140 chuangin hliam an tuar a, service member 18-in hliam an tuar bawk.

Taliban-ten Afghanistan-a thuneihna an chan hnuah ram danga tlanchhuah tumin mi tam tak chu Kabul airport-ah hian an awmkhawm reng a ni. Nilaini khan khawthlang ramte chuan Islamic State (IS) firfiakte airport leh a chhehvelah pawikhawihna thlen an tum nia sawiin, airport-a awmte chu kalchhuak vek turin an lo ngen tawh a ni. Mahse hetichung hian mi tam tak chu an awm zui reng a ni.

US Central Command head, General McKenzia chuan airfield-ah hian thlawhtheihna nghakin mi 5,000 vel an awm niin a sawi.

Bomb hmasa zawk hi airport luhna, Abbey Gae bulah tihpuah a ni a, bomb puah hnu hian silai pawh a puak zui bawk a ni. Minute reilote hnuah airport bula hotel, British official-ten UK-a kal turte an buaipuina bulah bomb pahnihna hi a puak leh a ni.

McKenzia chuan airport-a inkaih­hruaina fel tawk lo vangin thihchilh bomb paitute hian gate bul hnai tak hi an thleng thei niin a sawi.

Airport-ah hian US leh khawthlang ram dang sipaite duty-in, an mi leh sa hruai haw turte an buaipui a ni. Hetih lai hian airport pawn lam hi Taliban-ten an veng ve thung.

IS-in an tih a nih thu an sawi
Afghanistan-a Islamic State (IS) firfiak pawl, ISIS-Khorasan (ISIS-K) chuan Kabul airport beitu an nih thu an news channel-ah an puang. Airport gate-a mi awmkhawmna laia thihchilh bomb tipuaktu thlalak pawh an tichhuak a ni.

ISIS-K hi khawthlang ramte leh Taliban pawl dodaltu an ni a, an thurualpui dangte nen Afghanistan-a Shia Muslim minority-te an bei fo a ni. Kum 2020 khan Kabul-a maternity hospital pawh beiin, nu leh nausente an that a ni.

Taliban-in pawikhawihna thleng an dem
Taliban chuan Kabul airport beih a ni chu an dem thu sawiin, thihchilh bomb tihpuahna lai hi US sipaiten venna bial a nih thu an sawi.

Taliban thupuangtu Zabihullah Mujahid chuan firfiakte chetna chu na takin an dem tih a sawi a, security lam pawh an ngai pawimawh leh zual dawn tih a sawi nghal bawk.

Kabul airport-a bomb puakah hian Taliban member 28 vel an thi tel niin Taliban official chuan a sawi a, "America aiin kan mite kan chan hnem zawk a ni," a ti. Pawikhawihna hi thleng mah se, an ram aṭanga ram dang sipaite chhuahfel hun tur atana August 31 lo ruat fel tawh chu pawhsei leh tihkhawtlai ṭulna a awm chuang lo tih a sawi bawk a ni.