US President-in phuba lak a tiam

US president Joe Biden chuan Kabul airport beih a nih hnua White House-a thu a sawiah, "He pawikhawihna thleng hi kan ngaidam dawn lo a, kan theihnghilh dawn bawk lo. Kan umzui zel dawn cheu a, in thiltih man in pe ngei ang," a ti.

President Biden chuan pawikhawihna thleng vang chuan Afghanistan-a US sipaite chu ruahman lawk angin an chhuah hma phah dawn lo tih sawiin, US sipaite chu IS-te beih dan ruahman turin a hrilh nghal tih a sawi bawk.

Biden chuan Kabul aṭanga America leh midangte hruaichhuah hna an thawh chu an chhunzawm zel dawn tih sawiin, 'firfiakte hian min dang thei dawn lo," a ti. Kabul airport-ah hian US sipai 5,800 leh UK sipai 1,000 an awm mek a ni.

August 15-a Taliban-ten thuneihna an chan hnuah Afghanistan aṭang hian civil mi 1,04,000 hruaichhuah an ni tawh.

Kum 2011, August thlaa helicopter kahthlak a nih avanga US sipai 30 an thih hnuah Ningani khan Aghanistan rama ni khatah US sipai an thih tam ber ṭum a ni. Kum 2020, February thla hnu khan Afghanistan rama inbeihnaah hian US sipai thi hi an awm tawh lo a ni.

White House thupuangtu, Jen Psaki chuan Kabul airport beihnaa thite sunna atan August 30 thleng White House leh public building-ah hnam puanzar a ngul chanve-ah zar a ni dawn tih a sawi.