Kim Jong-nam tihlumah North Korea puh

US chuan North Korea ram hotu lu ber, Kim Jong-un-a unaupa, Kim Jong-nam a chu North Korea sorkar thupek anga tur hmanga thah ngei a ni tih a sawi.

Kim Jong-nam hi Kim Jong-un-a nena pa thuhmun, nu hrang an ni a, nikum February 13 khan Malaysia-a Kuala Lumpur airport-ah hmeichhe pahnihin a hmaiah VX nerge agent an tahsak a, a hnu lawkah na tak tuarin a thi a ni. Heng hmeichhe pahnihte hian midang tirh an nih thu leh, TV show atan infiamna tura an ngaih thu an sawi. An pahnih hian man niin, tualthah thubuai siamsak an ni tawh a ni.

Kim Jong-nam thah a nih chungchangah hian US chuan NKorea hi a inrawlh niin a hma pawhin a lo puh fo a, mahse NKorea chuan thu dik lo niin a sawi thung.

US chuan Kim Jong-nam-a chunga thil thleng vang hian North Korea ram hrekna thar a siam dawn tih a sawi a, hrekna thar hi March 5 aṭanga hman a ni ang.

US State department thupuangtu Heather Nauert chuan thuchhuah siamin, Chemical and Biological Weapons Control and Warfare Elimination Act of 1991 hnuaiah February 22 khan Kim Jong-nam beih nan VX nerve agent hi hman ngei a ni tih sorkar chuan a lo tichiang tawh niin a sawi. NKorea hian international law kalhin, ama ram mi ngei chungah chemical weapon hi a hmang a ni, tiin Secetary of State Rex Tillerson chuan a sawi.