Suu Kyi-i hnena chawimawina hlan hlih sak

US Holocaust Memorial Museum chuan Myanmar ram hruaitu, Aung San Suu Kyi-i hnenah human rights award a lo hlan tawh chu Myanmar rama Rohingya Muslim-te beih an nih chungchangah hma a lak ṭhat duh loh avangin a chawimawina lo hlan tawh chu a hlih sak leh.

Kum 1991-a Nobel Peace Prize dawngtu, Suu Kyi-i hi kum ruk kalta khan Holocaust Museum chuan an ram mipuite zalenna leh zahawmna humhalh tuma bei a, huaisen taka sipai sorkar rorel dan a do let avangin chawimawina, Elie Wiesel award chu a lo hlan tawh a ni.

Mahse Museum chuan tun hnaia Rohingya muslim-te chunga Myanmar sipaite rawnga taka an chet chungchangah, Suu Kyi-i hian sipaite chetdan demna thu leh, an thiltih dang tura hma a lak loh thu a sawi. Suu Kyi-i hnena lehkha an thawnah, "Museum chuan kum 2016 leh 2017-a Rohingya-te chunga sipaite chetdan rawng tak chu hailan a ni tawh a, mihring dikna chanvo humhalh tura i lo inpekna tawhnate avanga mi tam takin kan ngaihsan rawn ang ngei chein, civil mite chunga sipaite chetdan hi i demna i auchhuapui a, i lo dan ngei kan duh a, Rohingya mite i tawrhpui leh an tana i din tur thu i sawichhuakte kan beisei a ni", a ti.

Hetih lai hian Suu Kyi-i party, National League for Democracy (NLD) chuan Rohingya mite beih an nih chungchang UN investigator-te an chhuinaah thawhpui an tum loh thu an sawi a ni. NLD hian Rohingya mi tam tak thah an ni leh, Bangladesh-ah nuai tel an tlanchhia nia sawi chungchang report tumtu journalis-te pawh an dang a ni.

Museum chuan Suu Kyi-i chu an ram sipaiten Rohingya mite chunga pawikhawihna nasa tak an thlen leh, mi tam tak an tihlum chu a dem thu auchhuahpui tur leh, a thuneihna hmanga sipaite lo dang tura an phut thu a sawi.

Memorial Museum-in award a siam chhan, Elie Wiesel hi German Nazi-ten Juda mi tam tak an sawisakna hmun aṭanga damchhuak niin, mihring dikna chanvo humhalhna tura beiin nasa takin a bei zui a, kum 1986 khan chawimawina sang Nobel Peace Prize pawh hlan a ni.