Pakistan-in Afganistan ramri hawn hun sawn hla

Pakistan chuan Afghanistan nena an inri-na a hawn hun tur chu a sawn hla.

Pakistan leh Afghanistan inkar ramri pawimawh, North Waziristan tribal bial-a Ghulam Khan border chu security force-ten Taliban firfiakte laka beihpui an thlak hnu, kum 2014 June thla aṭang khan khar a ni.

Ramri hi March 7-ah kar khat chhung atan hawn tura ruahman a ni a, mahse tiam chin awm loin khar chhunzawm a ni leh ta zawk a ni. Ramri hawn tum ṭhulh a nih chhan hi sawifiah a ni lo.

Pakistan chuan kum 2016 aṭang khan Afghanistan nena an inkalpawhna kawng lian ber, Torkham ramri kaltlanga an rama lutte tan passport leh visa system a siam a ni. He system hi Chaman crossing-ah pawh hman a tum a ni.

Official-te chuan Ghulam Khan border point chu tunlai hmanraw ṭha ber hmanga thuam a ni dawn tih sawiin, trade route lian ber a ni thei dawn niin an sawi. He kawng hi Karachi port aṭanga bungraw phurtute pawhin an hmang thei dawn a ni.