Trump leh Kim Jong-un ten inhmuh an tum

North Korea hotu Kim Jong-un chuan US President Donald Trump chu meeting neihpui turin a sawm a, he sawmna hi Trump-an a pawm thu White House chuan a sawi.

Tun hnaia North Korea tlawha, Kim Jong-un-a hmutu South Korea palaite chuan US hi tlawhin, NKorea palaite nena an inbiak dan chungchang chu US official-te an sawipui a ni. Kim Jong-un chuan SKorea palaite hi Trump-a lehkha tur alo thawn nghal a ni.

SKorea palaite chuan Kim hian nuclear leh missile test an neih ṭhin pawh tihtawp a, nuclear ralthuam tihbona tura hma lak pawh a lo remti niin an sawi.

Donald Trump chuan NKorea ram hotu thusawi chu hmasawnna ropui tak a nih thu a sawi a, hemi rual hian inremna fel tak siam a nih hma chuan an hrekna siam tawh chu hman chhunzawm zel a la ni dawn tih a sawi bawk.

US tlawha kal, South Korea palai National security adviser Chung Eui-yong chuan President Trump-a an hmuh hnua White House pawna chanchinthar lakhawmtute a kawmnaah NKorea hotu meeting an neihpui chungchang hi President Trump an hrilh thu leh, a lehkhathawn pawh an pe nghal tih a sawi. Trump chuan May thlaah Kim Jong-un chu hmuh a tum thu a sawi niin a tarlang.

Japan Prime Minister Shinzo Abe chuan Trump-Kim meeting neih tur chu lawmawm a tih thu a sawi a, hemi rual hian NKorea chu a nuclear program titawp tura theihtawpa an nawr chhunzawm zel tur thu a sawi.

US President nih laia North Korea ram hruaitu meeting neihpui hi an la awm ngai lo a, mahse NKorea hi a nuclear programme titawp turin an nawr reng thung.