China president term chelh theih chin bithliah titawp

China National People's Congress chuan an ram president dinhmun chelh thei tur term, term hnih chin bithliah titawpna chu tur nimin khan an pass.

China hian kum 1990 aṭang khan president dinhmun hi mi pakhatin term hnih chin bak chelh thei lo turin khuahkhirhna a lo siam tawh a ni. He khuahkhirhna hi tihtawp a nih chuan President ṭanglai Xi Jinping chu thlan nawn zel theih a ni dawn a ni.

February thla khan rorellai Communist Party chuan ram danpuiin president term bithliah chin a siam chu tihtawp a lo rawt tawh a ni. Hei rawtna hi National People's Congress chuan nimina annual conference an neihah lungrual takin an pass ta a ni.

National People's Congress hi China rama roreltu sang ber, ramdanga an parliament ang tluk a ni a, mahse Congress hian Communist Party thutlukna dodal zawngin a vote ngai lo. Hei vang hian Communist Party duhdan nemnghettu anga ngaih a ni fo ṭhin.

Congress-in president term chelh thei zat bithliah a titawp hi sawiseltu eng emaw zat an awm tho a, president leh vice president term duh chen chen thlannawn theih hian buaina a chawk chhuak thei dawn niin an sawi.

President Xi Jinping hi kum 2012 khan China president atan lakluh niin, tunah hian term hnihna a chelh mek a, kum 2023 thleng hun a la nei a ni. Mahse term chelh theih zat tihtawp a nih tak avangin thlan tlin a nih zel chuan a damchhung pawhin he dinhmun hi a chelh thei dawn a ni. Xi Jinping hi Mao Zedong hnua China ram hruaitu ropui bera ngaih a ni pha tawh a ni. President a nih aṭang hian an rama eirukna umbo tumin theihtawp a bei nghal a, official eng emaw zat hrem leh man an ni tawh a ni.