Firfiakte'n Kabul Airport beih an tum leh niin US President-in a sawi
US president Joe Biden chuan firfiakten Kabul airport an bei leh ngei dawn nia a lan thu leh commander-te pawhin rei a rial an rin loh thu a sawi. Hei vang hian US mi leh sa, airport leh a chhehvela awmte chu inthiarfihlim thuai turin a ngen.
Kar liam ta Ningani zana firfiakten airport bula thihchilh bomb an tihpuah vanga thi chu mi 170 an tling tawh a ni. He pawikhawihna hi Afghanistan-a Islamic State (IS) group, Islamic State in Khorasan Province (IS-K) chuan an tih a nih thu an sawi tawh bawk.
US sipaiten IS-K hmun bei
Kabul Airport-a firfiakte pawikhawihna thlenga thi zingah hian US sipai 13 an tel. He pawikhawihna thlen chhang letin, US sipaite chuan Zirtawpni khan Afghanistan khawchhak lama IS-K hmun an bei a, firfiak pawl member pawimawh pahnih an thi tel nia sawi a ni.
President Biden chuan beihpui thlak a nih chungchang hi sawiin, hei hi a tawpna tur a ni lo tih a sawi. "Kha pawikhawihna rapthlak thlenga inhnamhnawihte chu kan zawng zui zel dawn a, an thiltih man kan pek tir ngei dawn a ni," a ti.
Afghanistan-a thuneitu thar, Taliban chuan US airstrike chu sawiselin, America chuan beihpui an thlak hma hian min berawn hmasa tur a ni, tiin an sawi.
Afghanistan-in medical supply tlachham thuai dawn : WHO
World Health Organisation (WHO) chuan ramchhung indona avanga harsatna tawk mek Afghanistan chuan medical supply an tlachham thuai dawn tih a sawi.
WHO chuan emergency health kits, hospital leh clinic tan damdawi, naupang hriselna pante tan chaw ṭha, leh Covid-19 hri leng dan chahna tura hmanrua pawimawh te an tlachham mek tih a tarlang. WHO emergency director for the Eastern Mediterranean region Rick Brennan chuan kar liam ta Ningania Kabul Airport-a bomb puah hnuin he airport-a commercial flight lut tur chu tihtawp nghal vek a ni tih sawiin, hei vang hian damdawite phurh luh theih a ni lo a, WHO chuan kawng dang a ngaihtuah mek a ni, a ti.
"Khuahkhirhna siam a nih avangin damdawi leh a hmanruate hi lakluh theih a ni rih lo a, mahse Pakistan sorkar puihnain tunkar chhoah chuan supply tam zawk a luh theih kan beisei.Kabul airport hi supply lakluhnan a hman theih rih dawn loa, chuvangin Mazar-i-Sharif airport kan hman mai a ngai dawn a, kan flight hmasaber chu ni rei lote chhungin kan nei thei ang," tiin Brennan chuan a sawi.
Afghanistan tualchhung dinhmun hian chhiat lam a pan zel a, mi tam tak chhawmdawl leh ṭanpui ngaiin an awm mek. United Nations chuan mipui maktaduai 18 dawnin ramdang ṭanpuina mamawhin an awm mek a, an zinga maktaduai 3.5 chu tualchhung buaina avanga an in leh lo tlanchhiatsante an ni, a ti.
Brennan chuan Afghanistan-a raltlan leh dinhmun harsa taka dingte ṭanpui turin WHO chu a awm zui zel dawn tih a sawi, hmeichhiate leh naupangte dinhmun chu ngaihtuah pui an ngai zawk niin a sawi.