UK sipaite inlachhuak fel

Afghanistan aṭangin Britain sipaite chu kar liam ta Inrinni khan an inlachhuak fel ta.

Kum 20 chhung Afghanistan-a an awm hnuah, British sipaite hi lakchhuak kim an ni ta a, Inrinni khan flight hnuhnung berah chhuakin Afghanistan-a an ambassador Sir Laurie Bristow pawhin nimin zing khan an ram a thleng ve ta a ni.

Taliban-ten thuneihna an chan hnuah British sipaite hian an mi leh sate hruaichhuah hna an thawk zui a, August 14 aṭang khan mi 15,000 chuang chu UK-ah hruai chhuah an ni. British mite bakah UK sorkar leh sipai hnuaia lo thawk ṭhin, Afghan mi 8,000 vel an hruai chhuak tel.

US pawhin an hun tiam, August 31-a inlakchhuak fel hman tumin hma an la mek bawk. Kar liam taa Kabul airport-a sipai 5,800 a dah pawh nimin chuan 4,000-ah a titlem tawh. Civil mi hruaichhuah tur pawh 1,000 chuang hret chauh an awm tawh niin US official chuan a sawi. America sipaite an inlakchhuah fel veleah airport-a thuneihna leh enkawl hna hi Taliban kutah hlan a ni dawn a, hemi atan hian an technical expert leh engineer-te pawh an inpeih tawh tih Taliban chuan a sawi.

Kar hnih liam ta aṭang khan Afghanistan aṭang hian ram dang mi awm leh Afghan mi 1,10,000 chuang hruai chhuah an ni tawh.