Singapore mipui 80% in Covid-19 vaccine la tawh
Singapore-a cheng mipui maktaduai 5.7 zinga 80% te chuan Covid-19 vaccine an la tawh tih official te chuan sawiin, khawvel ram zinga vaccine la ṭha ber ram an ni a, khuahkhirhna pawh an thlahdul chho zel a ni.
"Rahbi thar kan kai leh ta, kan ram mipui 80% chuan vaccine dose bikim an la thei ta," tiin Singapore Health Minister Ong Ye Kung chuan Facebook kaltlangin a puang. "Singapore chuan Covid-19 kan do zawh theihna turin hmalam kan pan leh a ni" a ti
Vaccine pekchhuah ṭhatna ramdang te chu United Arab Emirates, Uruguay leh Chile-te niin, an ram mipui 70% chuan dose kimin an la tawh bawk.
Singapore hian kumin January aṭang khan vaccine hi an semchhuak ṭan a, vaccine an semchhuah tam zawk chu Pfizer-BioNTech leh Moderna-te an ni.
August thla tir khan health minister Ong chuan,"Singapore in hri kai natna langchhuak lo leh damlo kan tihtlem theih a, damlo enkawlna hmunte a thawl ṭhat chuan kan ram hian kan economy kan hawng thei tawh ang a, social activities leh quarantine ngai loa zin veivah pawh phal an ni tawh ang. Nitin khawsak a pangai tawh anga, kan eizawnna pawh ṭha zawkin kan venghim thei tawh dawn a ni," tiin a lo sawi tawh a ni.
Mipui ṭhahnem tak punkhawmna, kum thar hmuahna hun te chu dan pangaiin an nei thei dawn a, sumdawnnate pawh a pangngai chho leh dawn a, Singapore mite chu hri leng khuahkhirhna ramah te chuan zin veivah phalsak an ni tawh ang.