Israel-in kum 12 leh chunglam tan Covid vaccine booster pechhuak

Israel chuan naupang kum 12 chin chunglam tan Covid-19 vaccine booster an pechhuak ṭan. Thla hmasa khan kum upa lamte chu booster hi pek ṭan an ni tawh a, hei hian an zinga Delta variant kai taksaa natna langchhuak pawh a tihtlem phah hle niin prime minister chuan a sawi.

Israel health official-te chuan Pathianni khan thuchhuah siamin, Pfizer-BioNTech vaccine lak zawh aṭanga thla rukna velah vaccine hnathawh hi a tlakhniam avangin booster lak ngei a pawimawh tih an sawi.

"Dose thumna hian dose hnihna kan lak hlima min venhimna ang kha min pe leh thei a ni," tiin Israel Health Ministry-a public health hotu Sharon Alroy-Preis chuan a sawi a, "Vaccine dose thumna lak hian a let sawmin min venghim ṭha zawk a ni," a ti.

Thla nga liamtaa dose hnihna latute chuan dose thumna hi an la thei dawn a, United States-a thla riat inkara an lak ṭhin aiin lak hunbi hi a tlem zawk a ni.

Hri inkaichhawn awlsam tak Delta variant khuahkhirh tuma an beihnaah thla hmasa aṭang khan Israel hian an ram mipui zinga kum upa lam hnenah booster hi an pechhuak ṭan a, kum 30 chinah ti lehin, Pathianniah khan kum 12 chinah an ti leh ta a ni. Mi maktaduai 9.3 in a dose thumna hi an la tawh.

World Health Organisation chuan vaccine hi ram hrang hrangah khairual zawka pek phawt a duh a, dose thumna pek aiin khawvela mi tam zawkin dose khatna an lak phawt chu ngai pawimawh hmasa turin a duh. Mahse hetichung hian Israel bakah ram dang ṭhenkhat chuan booster, dose thumna hi an pechhuak tho a ni.

US chuan vaccine hnathawh hi a tlakhniam ve zel avangin America mipuite tan booster dose an pechhuak dawn tih a sawi a,Canada, France leh Germany-te pawhin booster campaign kalpui turin hma an la mek bawk.