China in zirlai kum 6-7 chin hnenah written exam tihtawp sak

China sorkar chuan zirlai naupang kum 6 leh kum 7 tan written exam tihtawp a nih thu a puang. Hei hi China school system-a inelna sang tak awm ṭhin tihziaawmna atan, school naupang leh nu leh pa phurrit chhawk zangkhai thei tura hma an lakna kawng khat a ni.

"Exam awm zing lutuk hi naupang tan phurrit a ni thei a, exam pressure sang lutuk hnuaiah an awm phah a ni" tiin Ministry of Education-ina Thawhṭannia kaihhruaina dan thar an tihchhuahah a tarlang. Ministry chuan kum naupangte an nih aṭanga nawrna nasa tak awm ṭhin chuan zirlaite rilru leh taksaah nghawng ṭha lo a nei thei tih a sawi.

Dan tharah hian exam buatsaih ṭhin pawh term khatah ṭum khat bak buatsaih phal a ni lo a, junior high school-ah chuan mid-term leh mock examination-te phal a ni. He dan siam thar hi sorkarin education sector siamṭhat a tumna niin, zirlaiten exam hautak zawk an hmachhawnna tura an inbuatsaihna atana nu leh paten sum tam tak an sen ṭhin tihziaawm tumna a ni bawk.

July thla tawp lam khan China chuan private tutoring firm-te chu hlawkna nei lo, non-profit-a let vek turin thuchhuah an siam a, tutoring agency-te chuan kartawp leh holiday-ahte core subject-a zirtirna an pek ṭhin pawh an tihtawp sak bawk. Zirna inthlau lutuk tihziaawm tumin sorkar chuan hma a la mek a ni.