Nepal-a thlawhtheihna tlaah mi 49 an thi

US-Bangla Airlines thlawhtheihna chu Thawhṭanni khan Nepal-a Tribhuvan International Airport (TIA) a ṭum tur chu chesualin a tla a, mi 49 an thi a, midang 22 in hliam an tuar.

Thuneitute chuan chetsualna thlen chhan hi pilot tihsual vang niin an sawi. TIA General Mangaer Rajkumar Chhetri chuan thlawhtheihna hi chawhnu dar 2:15-a a ṭum tur chu pilot in ṭum fuh loh avangin a chesual ta niin a sawi. He thlawhtheihnaah hian mi 71 an chuang a, an zingah hian thawktu pali an tel. A tlak hian airport-a Thai Airways thlawhtheihna lo ding pawh a su tel teuh hle nia sawi a ni.

UBG211 flight hi Dhaka, Bangla-desh aṭanga Kathmandu pan a ni a, airport-ah ṭum a tum hian ṭum hnih airport hi a thlawhkual hmasa a ni.

Thlawhtheihna tlakna hmunah hian Nepal Police leh Nepal Army-a rescue team-te tirh nghal an ni. Thlawhtheihna hi a kan zui avangin kangṭhelhtu eng emaw zat tirh an ni bawk a, reiloteah a kang hi an ṭhelh mit nghal a ni. Hliam tuarte hi damdawi-inah hruai an ni a, an zinga ṭhenkhat chu an dinhmun a ṭha lo hle.

Chetsualna thleng vang hian TIA hi khar nghal a ni.

Nepal Civil Aviation Authority chuan thlawhtheihnaa khualzin chuang zinga 33 chu Nepal mi niin, Bangladesh mi 32 bakah China leh Maldive mi pakhat ve ve an awm niin a sawi.

Prime Minister KP Shrama Oli chuan a minister-te nen airport hi an pan nghal a, chetsualna thlen dan chu chhui a ni dawn tih a sawi. PM Oli han Bangladesh Prime Minister Sheikh Hasina pawh a be nghal a, a tawrhpui thu a hrilh a ni.