Myanmar-in Rohingya-te awmna hmunah military base siam

Myanmar aṭanga Rohingya Muslim nuai sarih dawn umchhuah an nih hnuah, Myanmar sorkar chuan in leh mosque tlanchhiatsan awmna hmunah hian sipai awmna tur a sa mek niin Amnesty International chuan a sawi.

Nikum August 25 aṭanga Myanmar sipaiten Rakhine state-a Rohingya Muslim-te laka beihpui an thlaknaah khan Rohingya-te chenna thingtlang khua 350 chuang zet chu halsak an ni. Amnesty chuan heng thingtlang khuaa in kang bang la awmte pawh Myanmar sipaite chuan bulldozer hmangin an chil chhiat sak niin a tarlang.

Human rights group chuan Rohingya-te chenna hmun ṭhinah hian in sak leh kawng siam hna thawh mek niin, sipaite hmun tur pathum pawh siam mek a ni tih a sawi. Military base siamna tur hian Rohingya mi la awm ṭhenkhatte chu insawnchhuah tir an ni tiin a sawi bawk. Kangmei laka him mosque pali pawh tihchhiat niin, a hmanruate lak nia sawi a ni.

Satellite image aṭangin Rohingya-te khua pakhatah chuan moque tihchhiatna hmunah hian police border post sak lai mek hmuh tur a awm a ni.

Hetih lai hian Myanmar official-te chuan Bangladesh-a tlanchhia, Rohingya raltlante an kir leh huna an in thar tur sakna atan in ding laite hi tihchhiat a ni thu a sawi. Myanmar sorkar chuan Rakhine state-a sipaite beihpui thlak chungchanga UN leh pawl dangte report siam chu a pawmpui lo tih a sawi a, Rohingya civil mite suat leh thenfaina atana he beihpui thlak hi neih a ni tia sawi chu a finfiahna pe turin an phut a ni.

Nikum November thla khan Myanmar leh Bangladesh chuan Bangladesh-a Rohingya raltlante hruai kirna tur hian inremna an lo siam tawh a, mahse a taka kalpui a la ni lo. Myanmar chuan raltlan kirte awmna tur temporary camp pawh siamfel a ni tawh nin a sawi.