President Trump-an Secretary of State a ban

US President Donald Trump chuan Thawhlehni khan Secretary of State Rex Tillerson a ban a, a thlaktu atan CIA Director Mike Pompeo a ruat nghal.

Rex Tillerson hi nikuma Secretary of State atana ruat a nih hnuah khan President Trump nen hian kawng hrang hrangah, a bikin US foreign policy chungchangah ngaihdan in ang lo an lo nei fo tawh a ni. Ban ni mah se Tillerson hian March 31 thleng a hna hi a thawk chhunzawm ang.

President Trump chuan a twitter-ah Rex Tillerson thlaktu atana Mike Pompeo ruat a nih thu a sawi a, hemi rual hian CIA Director atan Pompeo-a deputy, Gina Haspel dah a nih tih a sawi bawk. Gina Haspel hi hmeichhe zinga CIA hotu dinhmun chelh thei hmasa ber a ni ang.

Trump chuan Rex Tillerson nen hian thlak a nih tur chungchang pawh hi an hun rei tak an lo sawidun tawh niin a tarlang. Tillerson nen chuan kawng hrang hrangah an ngaihdan a inkalh a, an thil thlir dan a thuhmun lo hle tih a sawi. Hemi rual hian Secretary of State a nih chhunga a inpekna leh a hnathawkte a fak thu a sawi a, mi ṭha tak a ni, a ti.

Secretary of State atana ruat thar, Mike Pompeo nen chuan thlir dan thuhmun nei an nih thu sawiin, an inkar boruak pawh a ṭha a, Secretary of State atana a mamawh tak niin a sawi. Mike Pompeo chu Secretaryof State ṭha tak a nih ngei arin thu a sawi bawk.

President Trump-an Tillerson a ban thu a puan hian Tillerson hi Africa tlawh a zin zo hlawt a ni a, ban a nihna chhan dik tak pawh sawichian ani lo niin a lamhnaite chuan an sawi. Mahse Tillerson hian a hma pawhin Trump hi a lo sawisel fo a, nikuma meeting neihah pawh Trump chu 'chhaw lutuk' tiin a lo sawi tawh a, hei vang hian Trump chuan IQ test nei turin alo cho let a ni.

Trump-an Tillerson a ban chu a kaihhruai sorkar pawhin ṭha a tih thu a sawi a, UN-a US ambassador Nikki Haley-i chuan President chuan thutlukna ṭha tak a siam nia sawiin, Pompeo chu a lawmpui thu a sawi. White House thupuangtu Sarah Sanders-i pawhin sipai lama tawnhriat alo neih tawh te, Congress leh CIA lama a tawnhriat neihte hian Pompeo chu a hna thar chelh tura atan hian a lo buatsaih ṭha tawk tawh niin a sawi.

Secretary of State thar atana Mike Pompeo ruatna hi Congress-in a pawmpui ve leh phawt a ngai dawn a, an pawm ngei rin an ni bawk.