Bangladesh thlawhtheihna chetsual chhan chhui mek

Thawhṭanni-a Nepal-a US-Bangla Flight BS 211 chetsual chhan chu chhui mek a ni a, report tihchhuah hmasakah he vanduaina thlen chhan hi air traffic controller leh pilot-te inbiak dan a fuh tawk loh vang niin a sawi.

Nepal civil aviation authority chuan thlawhtheihna hi Kathmandu airport chhim lama Runway 02 aṭanga a ṭum phalsak a ni a, mahse a kalna kawng lam thlak thutin vei lamah a thlawk a, airport hmarlama Runway 20 aṭangin ṭum niin a tarlang. Mahse US-Bangla airlines CEO Imran Asif chuan Civil Aviation Authority thusawi hi a pawm lo tih sawiin, ATC hian pilot hnenah information dik lo a hrilh a, hei vang hian a chetsual phah niin a sawi.

Imran Asif chuan, "Pilot Captain Abid Sultan chu a him a, he chetsualna thleng hi a thiam loh a ni lo. Pilot thiam tak a ni a, kum thum chhung thlawhtheihna khawl lamah hian buaina pawh kan nei ngai lo", a ti.