Covid-19 laka fihlimah New Zealand puang Ram chhunga inkhuahkhirhna thlahdul

New Zealand-ah ni 17 chhung Covid-19 kai thar an awm tawh lo a, he hri kai enkawl awmchhun pawh enkawl dam a ni tak avangin an ram chu coronavirus laka fihlimah an puang. 

Covid-19 kai an awm tawh loh avangin, ram chhunga inkharkhipna leh inkhuahkhirhnate chu hlih nghal vek a ni a, mahse ramri te erawh chu khar chhunzawm a la ni ang. 

New Zealand-ah hian February 28 khan Covid-19 kai an awm tih hriat a ni a, March 25 aṭang khan sorkar chuan lockdown a puang zui a ni. 

New Zealand-ah hian mi 1,154-in Covid-19 hi an kai hman a, an zinga mi 22 in an thihpui a ni. April thla aṭang khan hri kai thar an tlem tial tial a, May 22 kha New Zealand-a hri kai thar awm hnuhnung ber a ni ta a ni. New Zealand-a Covid-19 hri kai hnuhnung ber chu enkawl a nih hnuah, darkar 48 chhung amahah natna a lan chhuah tawh loh avangin an dahhranna (isolation) aṭanga lakchhuah a ni ta a ni. Hei vang hian New Zealand chu Covid-19 awm lohna ram a nih thu Director General of Health Dr Ashley chuan a puang a ni. 

Ni 17 lai hri kai thar an awm tawh loh hnuah sorkar chuan ram chhunga inkhuahkhirhna hrang hrangte chu a thlahdul ṭan tawh a, social distancing dan leh mipui punkhawm khapna dan pawh thlahdul a ni tawh ang. School, hnathawhna, inneihna, public transport leh thil dangte pawh sorkar chuan a phal tawh dawn a, mahse ramri erawh a la khar chhunzawm ang. 

Prime minister Jacinda Ardern chuan an ramah ni 75 chhung khauh taka in­kharkhipna kalpuina rah a lang niin a sawi a, an rama hri kai an awm tawh loh tih a hriat chuan hlim takin a lam tih a sawi bawk. WHO-in he hri leng hlauhawm dan phung level 4-a a ṭhen hran chu level 1-ah an ram a awm thu a sawi bawk. "He hri dona kawngah hian healthcare worker-te chungah leh mipuite chungah lawm thu ka sawi a, kan ram chu Covid-19 awm lohna ram a ni ta," tiin a lawmthu Jacinda chuan an ram mipuite hnenah a sawi. 

Thailand-ah kar hnih chhung chu tualchhungah hri kai hmuh thar an awm lo. 

Kar hnih liam ta chhungin  hri kai hi mi 77 hmuh thar ni mah se, heng mite hi ram pawn aṭang lut vek an ni. An vai hian Thailand an luh hnuah khung hran nghal vek an ni tih Centre for COVID-19 Situation Administration thupuangtu, Taweesin Wisanuyothin chuan a sawi. 

Denmark chuan hripui leng vanga khuahkhirhna a siamte a thlahdul chho mek a, nimin aṭang khan vantlang hmuna mi 10 aia tam punkhawm khapna a siam pawh siamṭhain, mi 50 chin a phalsak. March 17 

aṭang hri darh zel tur venna atan mipui punkhawm khapna hi siam a ni.

Punkhawm khapna hi mi 50 chinah thlahdul a ni a, July 8-ah mi 100 leh August 8-ah mi 200 chin phal a ni leh ang. Fitness centre leh swimming pool-te pawh hawn chhoh zel tum a ni bawk. 

Nimin khan China ramah hri kai hmuh thar pali an awm tih National Health Commission chuan a tarlang. 

Covid-19 kai pali hmuh chhuah te hi ram pawn aṭanga lutte an ni a, Pathianni khan ram dang aṭang lut mi parukin he hri hi an kai tih hmuh a ni bawk. Ni hnih chhung hian hri kai, mahse an taksaa natna langlo, asymptomatic pasarih hmuh chhuah an ni bawk. Mahse China hian asymptomatic-te hi confirm case-ah a chhiar tel lo thung. 

China rama hri kai hmuh tawh hi mi 83,040 niin, an zinga 4,634 in an thihpui tawh a ni. 

Worldometers-in a tarlan danin nimin thleng khan khawvel pumah Covid-19 kai hi mi 71,06,010 an awm tawh. Hri kai zinga 4,06,395 in an thihpui tawh a, hetih lai hian mi 34,67,367 chu enkawl dam an ni tawh thung. Hri kai mek zinga 98% chu dinhmun ngaihtuahawm lo an ni. 

US chu hri kai tamna leh hri vanga thi tamna ber ram a la ni chhunzawm zel. US-a hian hri kai hmuh tawh hi mi 20,07,449 an awm tawh a, mi 1,12,469 in an thihpui tawh. Brazil, Russia, Britain, India, Spain, leh Italy ramah hri kai hmuh chhuah tawh hi nuai hnih chuang an awm tawh hlawm bawk.