UK-in Russian diplomat 23 a hnawtchhuak

United Kingdom (UK) chuan an rama awm Russian diplomat 23 a hnawtchhuak a, an ram chhuahsan turin kar khat chhung hun a pe.

Kar hmasa khan Russian spy hlui pakhat chu Salisbury-ah Russia siam tur hmanga hrai a ni a, he thilah hian Russia chu inrawlhah Britain Prime Minister Theresa May chuan a puh a ni. He thil thleng chungchang sawifiah tura Russia a phutna chu Russia lamin a chhan duh loh avangin palaite hi kar khat chhunga UK chhuahsan turin a ti a ni.

UK chuan UN Security Council hnenah Russia hian Britain ram chhungah ngei hmanraw hlauhawm, indonaa pawh hman khap chu a hmang a ni, a ti. PM May-i chuan Russia foreign minister zin tura a sawmna pawh a sut nghal a, Russia-in FIFA World Cup a thlen turah pawh a hawnna inkhawmah Royal Family an kal dawn lo tih a sawi.

March 4 khan Russian spy hlui, a hnua Britain intelligence agency hnena thuruk hrilh chhawng lehtu, Sergei Skripal, 66, leh a fanu kum 33 mi Yulia Skripal-te chu nikhaw hre loa an awm hmuh an nih hnuin damdawi-inah enkawl an ni a, an dinhmun a ṭha lo hle. Skripal-te pafa hi Russia siam tur hlauhawm tak, nerve agent hmanga beih nia sawi a ni.

UN-a Russia ambassador Vasily Nebenzya chuan Russian spy hlui beihnaah Russia inrawlh nia puhna chu phain, Britain hnenah an puhna finfiahna pe turin a phut. Nebenzya hian Britain hian insawifiah an phut nia an sawi chungchangah, darkar 24 hun pein insawifiah tur ni loin thil tisual nia an puhna an pawmna thu puang turin an phut zawk niin a sawi.

UN-a Britain deputy UN ambassador Jonathan Allen chuan Russia chu Convention on the Prohibition of Chemical Weapons hnuaia a thutiamte bawhchhiaah a puh a, UK sorkar chuan Organisation for the Prohibition of Chemical Weapons hnenah Salisbury-a Skripal-te pafa laka hmanrua hman hi enfiah turin a ngen tih a sawi bawk.