Palestinian PM convoy beih a nih dan Hamas-in chhui

Palestinian Prime Minister Rami Hamdallah-a convoy chu Thawhlehni khan Gaza-ah bomb hmanga beih a ni a, he pawikhawihna thlen dan hi Gaza Strip-a roreltu Hamas chuan Nilaini aṭang khan a chhui.

Gaza Strip Interior Ministry chuan thuchhuah siamin,he pawikhawihna thleng chhuitu tur inquiry team din a nih thu a sawi. PM Hamdallah convoy beihnaah hian a bodyguard parukin hliam an tuar a ni.

PM Hamadalah hi Gaza Strip-a desalination plant hawn en tura kal a ni a, Palestinian Intelligence Chief Majid Faraj-a'n a ṭawiawm a ni. PM convoy in Gaza an luh hnu lawkah bomb hi tihpuah a ni.

Palestinian pawl pahnih, Gaza Strip-a roreltu Hamas leh West Bank-a roreltu Fatah-te inkar hi a ṭha lo ṭhin hle a, mahse nikum October thla khan Egypt sorkar hmalaknain pawl pahnihte hian thuneihna inṭawm sorkar siam turin inremna an siam a ni. Inremna an siamah chuan Hamas hian Gaza-a a thuneihna hi December thlaah Ramallah-a hmunpui nei, Hamdallah kaihhruai sorkar kutah a hlan ang tih ani a, mahse an inkar boruak ṭha lo avangin an he inremna kalpui hun tur hi a tikhawtlai a ni.