Miami-a lei chimah mi pali an thi

Miami, US-a Florida International University bula kea kalna tur lei dawh chu Ningani tlai khan a chim a, mi pali an thi a, mi dang 10 in hliam an tuar.

Lei hi ton 862-a rit, feet 174-a sei a ni a, eight-lane motorway chunga dawh niin Ningani tlaia a chim hian a hnuaia motor pariat a delh chhia a ni. He lei hi kar kalta Inrinni-a darkar ruk chhung leka an dawh a ni a, 'accelerated bridge construction' method hmanga dawh a ni. He method hmang hian lei dawh turte hi a sirah remkhawm phawt niin, remkhawm zawhah a awmna tur hmunah hian an dah a ni.

Miamade-Dade Fire Chief Dave Downey chuan Ningani zan thleng khan chhanchhuah hna thawh a nih thu a sawi a, Kendall Regional Medcial Center-ah hliam tuar 10-te chu hruai niin an zinga pahnih chu an dinhmun a ṭha lo hle niin a sawi.

US President Donald Trump chuan lei chim vanga vanduaina tawkte a tawrhpui thu sawiin, chhiatna thlen dan chu a thlithlai zui tur thu a sawi. Florida Governor Rick Scott leh Senator Marco Rubio chuan Ningani zan khan lei chimna hmun hi an tlawh a, National Transportation Safety Board-a specialist team an hruai bawk a ni. Governor Scott chuan lei chim chhan chu chhui chian anih tur thu a sawi a, mahse a pawimawh hmasa ber chu hliam tuarte an dam leh theihna tura ṭawngṭaisak a nih thu sawiin, lei chim vang thi chhungte tana ṭawngṭai sak turin mipuite a ngen bawk.

Lei an dawh hi college leh zirlaite chenna inkara dawh niin, university zirlai leh staff-te hian kawngpuia traffic tawt lutuk an pumpelh theih nan lei hi dawh turin an lo ngen tawh a ni. Kum 2017 August thla khan zirlai pakhat chu kawngpui a kan laiin motor-in alo chil hlum tawh a ni.

Lei dawh hna thawktu Munilla Construction company (MCM) chuan vanduaina thleng chu pawi a tih thu a sawi a, he lei dawh hna thawhnaa tel ve dang FIGG Engineering pawhin vanduaina tawkte an tawrhpui thu sawiin, firm pahnihte hian lei chim chhan chhuinaah thuneitute chu theihtawpa an thawhpui tur thu an sawi. He lei dawhna atan hian USD maktaduai 14.2 sen niin, a senso hi US Department of Transportation in a tum a ni.