Eastern Ghouta aṭangin civil mi 12,500 thiarchhuak

Syria khawpui Damascus khawdaia Eastern Ghouta-a Syria sorkar leh hel pawlte inbeihna avangin Ningani khan he biala cheng civil mi 12,500-te chu thiarchhuah an ni.

Syria sipaite chuan Ningani khan Eastern Ghouta-a Hamouriyeh district chu hel kut aṭangin an la let niin an sawi. Syrian Observatory for Human Rights chuan civil mite thiarchhuah an nih lai pawhin Syria sorkar chuan sipaite chu Hamouriyeh-ah thawn lutin inbei mai thei turin a inrin tir reng niin a sawi. Ningani-a civil mi 12,500 thiarchhuah an ni hi kar hnih liamta-a civil mite chhuahna hun hawnsak tura inbeih chawlh lailawk a nih hnua ṭum khata an chhuah hnem ber a ni. Nilaini khan civil mi 90 vel chu thiarchhuah an lo ni tawh bawk.

Nilaini vek khan helpawl kuta la awm mek, Eastern Ghouta-a Douma district-ah chhawmdawlna sem tur phurtu truck 30-te tirh luh a nih thu International Committee for the Red Cross chuan a tarlang.Heng chhawmdawlnate hi Syrian Arab Red Crescent leh United Nations-te nena thawkhoa an thawn luh a ni a, thla kalta ṭanga chhawmdawlna thawnluh a nih ṭum thumna a ni.

Kar kalta Zirtawpni khan ei tur phurtu truck 13 chuan Douna hi an lut a, wheat bag 3,240 leh ei tur dang parcel 2,400 an phur lut a ni.

Eastern Ghouta-ah hian helpawl lian pali an la inkhuar mek a, chungte chu Islam Army, Failaq al-Rahman, Ahrar al-Sham, leh Levant Liberation Committee-te an ni. Syria sipaite chuan Eastern Ghouta-a bial 62% chuang chu helho kut aṭang hian a la let tawh a ni.