NKorea foreign minister-in Sweden a tlawh

North Korea foreign minister Ri Yong-ho chuan puangzar lawk loin Sweden a tlawh a, hei hi US President Donald Trump leh NKorea hotu Kim Jong-un te meeting neih tur inbuatsaih lawkna pakhat niin mi tam takin an ngai.

Sweden hi Washington leh NKorea inkara palai hna lo thawk fo tawhtu a ni a, hei vang hian NKorea minister zin pawh hi US-North Korea summit neih tur atana inbuatsaihna nia ngaih a ni. Mahse NKorea chuan minister zin chhan ram pahnih inlaichinna thil vang zawk niin a sawi.

NKorea hotu Kim-an inbiakna neih tura a awmna chu US President Trump chuan kar hmasa khan a pawm thu a lo sawi tawh a, hei hi ram hrang hrang hruaitute mak tih pawh a hlawh hle. Mahse Trump-an a pawm thu a sawi hnua hian NKorea lam chuan official-in thuchhuah engmah an la siam lo.

Sweden Prime Minister Stefan Lofven chuan ram pahnihte hian an inkara palai hna thawk tura Sweden an duh a nih chuan an inpeih reng tih a sawi.

US chuan NKorea minister-in Sweden a tlawh hi a hriat thu a sawi a, mahse hei hian US-North Korea inbiakna neih tum nen inkungkaihna a neih leh neih loh erawh a hriat loh thu a sawi a ni. President Trump hian Kim-an inbiak a rawtna a pawm thu sawi mah se ram hruaitu pahnihte hian inbiakna an nei ngei dawn em tih leh, an inbiakna tur hmun leh an thu sawidun tur chungchang pawh engmah tihchian a la ni lo.