Scientist-te'n hmar tawpa awm thliarkar an hmu chhuak

Hmar tawpa (northernmost) thliarkar awm eng nge tia zawhna chu 'Oodaaq' tia chhan a ni ṭhin. Mahse scientist-te chuan tunhnai khan 'Oodaaq' aia North Pole hnaih zawk thliarkar thar an hmu chhuak niin an sawi.

July thlaa 'expedition' an neihnaah scientist-te chuan khawvela North Pole hnaih ber thliarkar thar an hmu chhuak a, hming erawh an la vuah lo.

Scientist-te chuan a tirah chuan 'Oodaaq' an thleng emaw an intih thu sawiin, mahse 'Oodaaq' aia hmar kil zawka awm thliarkar zawk an thleng ta tih an sawi. An thliarkar hmuh chhuah thar hi 'Oodaaq' aṭangin hmar lam metre 780 (ft 2,560) vela awm a ni a, sea level aia metre 30-60 vel leka sanga awm a ni.

Expedition mission head, Copenhagen University-a department of geosciences and natural resource management-a mi Morten Rasch chuan," Ka GPS-ah thil fel lo a awm a ni tih hriattir ka ni a, chumi avang chuan Oodaaq thliarkarah ka ding a nih kan inring hman a ni," tia sawiin, an thliarkar hmuh chhuah thar chu eng anga rei nge a awm dawn tih hriat a har thu leh thlipui na taka a rawn thawh erawh chuan a bo leh thut thei tih a sawi.

An thliarkar hmuh chhuah thar hi a lian lo hle a, tuipui hnuaia awm ṭhin chirh leh 'moraine' a awm thu a sawi bawk.

Thliarkar an hmuh chhuah thar hmingah hian 'Qeqertaq Avannarleq' tih vuah an duh niin expedition team chuan an sawi a, chu chu Greenlandic ṭawng niin a awmzia chu 'hmartawp bera thliarkar awm' tihna a ni.

Tumreng vanga hmu chhuak an ni lo
Morten Rasch chuan thliarkar thar chu an tum reng vanga hmu chhuak an nih loh thu sawiin, sample la tura an kalna lamah an hmu chhuak tih a sawi.

An thliarkar thar hmuh chhuah hi a te angreng hle a, metre 30 bial vel leka zau a ni. Mahse thliarkar te an hmuh chhuah hi a bo leh mai ṭhin niin scientist-te chuan an sawi bawk.

Scientist-te chuan 'Oodaaq' an thleng emaw tia Danish official, Arctic island register-na kawnga hmalatute an awmna chin an han finfiah tir chuan North Pole a lo hnaih zawk fe tih an han hriat chhuah takah chuan thliarkar tharah an awm tih an hmu chhuak ta a ni.

Oodaaq ve thung chu
Greenland hmar tawpa thliarkar awm 'Oodaaq' hi North Pole hnaih ber thliarkar nia hriat a ni ṭhin. He thliarkar hi North Pole aṭanga Km 700 vela hlaa awm niin, Kum 1978-a Danish survey team-in an hmuh chhuah a ni.

Thliarkar te tak te, metre 15-a sei leh metre 8 leka zau a ni. Kum 2004 khan National Geographic World Atlas chuan 'Oodaaq' chu Khawvela leilung awmna hmar kil ber niin an lo ziak tawh bawk.

Inhnialna awm thei chu
North Pole chhehvelah hian thliarkar te tak te te a tam a, 'Oodaaq' ngei pawh hi mi tam tak chuan thliarkar pawm harsa an ti ṭhin. Henglai velah hian thliarkar te ho hi an bo leh mai ṭhin a, chumi a nih avang chuan thliarkara pawm harsa ti pawl an awm ṭhin.

Tuna an hmuh chhuah thar pawh hi a bo leh thut thei tih Scientist-te chuan an sawi a, chumi a nih avang chuan mi ṭhenkhat chuan pawm harsa an ti ve viau mai thei a ni.