Myanmar : Yangon leh Mandalay khawpuiah bomb a puak

Myanmar-a sumdawnna hmunpui pahnih, Yangon leh Mandalay khawpui huamchhunga hmun 12 aia tlem lohah Pathianni leh Thawhṭanni khan bomb tihpuah a ni a, National League for Democracy (NLD) party leh sipaiten an thlawp, Union Solidarity and Development Party (USDP) office-te pawh beih tel an ni.

Thawhṭanni zingkarah khan Yangon khawpui huam chhungaa hmun panga - Insein, Kamayut, Sanchaung, South Okkalapa leh North Okkalapa-ahte bomb hi tihpuah a ni.

Bomb puak zinga tam zawk chu kawngpui infinna laia traffic police booth-ah a ni. Insein-a hmun paliah bomb hi a puak a, Pauktawwa, Japan Road-a traffic booth leh Insein Township-a Gyoegone Ward infinnaah pawh pawikhawihna hi a thleng bawk.

Tualchhung mi pakhat chuan zing dar 4:50-ah Insein Township-a Japan Road leh Lower Mingaladon Road inkara bomb puak ri ring takin a tihharh thu a sawi.

Bomb puak vang hian thi leh hliam an awm hriat an ni lo. Mahse , tualchhung sipaite chuan Thawhṭanni chhunlai khan private lirthei leh bridge pathum - Bayint Naung, Aung Zaya leh Shwepyithar-a taxi tlante an endik a ni.

Mandalay khawpui huamchhung, Maha Aung Myay Township-a NLD office chu sipai lamin an dap hnu lawkah bomb hmang hian beih zui a ni veleh niin tualchhung media-te chuan an tarlang. Pawikhawihna thlentu hi Pyu Saw Htee pawl mi leh sa nia puh a ni bawk. He pawl member-te hi sipaite chuan training pe ṭhinin, ralthuamte pawh an pe bawk nia sawi a ni. Sipai thlawp, USDP party chu Pathiannia beih a nih avangin NLD office hi an bei let nia sawi a ni.

Pathianni vek khan Chanmyathazi Township-a forest department office bula sipai convoy bulhnaia bomb tihpuah a ni bawk. Sipaite hian sipai rorelna duh lohna lantirin nawrh huaihawtte an lo chang nia sawi a ni. He bomb puakah hian sipai zingah hian thi an awm nia sawi a ni bawk.

Yangon-a Thingangyun Township-ah pawh bomb tihpuah a ni. Sipaiten an bomb chhar sut tura an kal laiin bomb hi tihpuah a ni a, he thil thlengah hian thi leh hliam an awm hriat an ni lo.

Hemi ni vek hian sipaite hnena thu thlen ṭhintu, kawktu nia puh U Tin Hlaing chu mi tu tih hriat loten Yangon-a Hlaing-ah a motor beiin an kaphlum a, a nupui pawhin hliam a tuar a ni.

Civil sorkar paihthla a, sipaiten thuneihna an chan duh lohna lantira nawrh huaihawtte hi sipaite'n kut an thlak ṭhin avangin, March thla tawp lam aṭang khan ralthuam nena sipaite beihletna hi a thlen fo tawh a ni. Hemi chhan letna atan hian sipai sorkar chuan Pyu Saw Htee group dinin, anni hian civil mite hming tichhiat nan school leh sorkar office-ahte bomb kamin an tipuak ṭhin nia sawi a ni. Sipai sorkar dodaltu eng emaw zat an that tawh bawk a, an zingah hian Aung San Suu Kyi-i party, NLDA member-te pawh an tel.

Kumin February 1-a civil sorkar paithlak a nih aṭang khan nawrh huaihawt zinga mi 1,020 chu sipai kut tuarin an thi tawh tih Assistance Association for Political Prisoners chuan a tarlang. Mi 7,630 vel man anni tawh bawk a, an zingah hian elected leader-te pawh an tel a ni.