Israel-in Palestinian Authority hnenah loan puk tir dawn

Israel sorkar chuan West Bank-a roreltu, Palestinian Authority thuam chakna turin kawng hrang hrangin hma lak a tum a, heng zingah hian sum lama harsatna an tawh mek phuhrukna turin loan, USD maktduai 150 puktir a tum tih a sawi.

Thawhṭanni khan Israel defence minister Benny Gantz leh Palestinian Authority president Mahmoud Abbas-te chuan meeting an nei a, hei hi kum tam tak hnuah Israel leh PA-in high-level meeting an neihna hmasa ber a ni. Meeting zawh hnuah Gantz chuan Palestinian Authority thuam chakna tura hma an lakna turte hi an sawi a ni.

Gantz chuan, "Palestinian Authority hi a chak zel a nih chuan Hamas-te an chak lo ve zel dawn tihna a ni," a ti.

Israel-in a hmalakna a puan hma hian US president Joe Biden chuan White House-a Israel prime minister thar Naftali Bennett nena meeting an neihah, Palestinian mite dinhmun chawikang tura hma la turin a lo ngen tawh a ni.

Defence Minister chuan PA hnena loan an pek tur hi Israel-in Palestinian-te hnena tax fund a lak ṭhin hmanga rulh tur a ni dawn tih a sawi. Sum hmanga an puih bakah Palestinian mi 15,000 te hnenah work permit pek belh a ni dawn a, West Bank-a chengte harsatna pawh chinfel dan ngaihtuah pui a remti bawk.