NASA SpaceX Demo-2 Mission - Van boruak Zirchian kawnga bung thar kaina an ti!
May 30 khan United States Of America, Florida-a National Aeronautics and Space Administration (NASA) field center hmingthang tak John F. Kennedy Space Center aṭangin NASA chuan a astronaut pahnih Robert Behnken leh Douglas Hurley-te chu a International Space Station (ISS)-a cham turin Space Exploration Technologies Corp (SpaceX) rocket hmangin a kap chhuak a ni.
US Astronaut pahnihte hian an kah chhuah tuk, Pathianni khan ISS-a Russia leh US astronaut awmte lunghah lailawkna hmun an thleng nghal a, tunah chuan khawvel pawn aṭangin khawvel lam thlirin an mit an len tawh.
Vansangah, a bikin ISS-ah hian mihring an inkap kai fo a, tunhnaia US-in a astronaut pahnihte a kap chhuak erawh hi chuan ngaihven a hlawh bik a, mi tam tak chuan van boruak zirchianna kawnga bung thar kaina a nih thu an sawi uar viau.
Bung thar kaina
nihna kawng khat
NASA hian an ram leilung aṭangin commercial spacecraft hmangin astronaut a la kap chhuak ngai lo a, tun hi a ṭum khatna a ni.
SpaceX hi sorkar agency a ni lo a, mimal company niin American entreprenuer leh philantropist Elon Mask-a ta leh a din a ni a, kum 18 chuaha upa a ni bawk. Heti chung hian an sulhnu chhinchiah tlak tak tak an hnutchhiah tawh a, thla hmasa ni tawp ni ber pawh khan khawvelin a theihnghilh tawh loh tur sulhnu chu an hnutchhiah leh ta phawt.
NASA-in SpaceX rocket leh spacecraft a hmang hian sawi zui a hlawh a, hei vang hian mi tam tak chuan van boruak zirchianna kawnga bung thar kainaah an ngai a ni.
Kum 9 a liam hnuah
US leilung aṭangin
US space agency NASA hian kum 2011 khan a Space Shuttle Program chu a titawp a, hemi hnu hian ISS-a a astronaut-te a tirh dawn pawhin an ram leilung aṭangin a kap chhuak tawh ngai lo a, Russia spacecraft an hmansak
ṭhin a ni.
US tana Russia hmanrua hawh a ngai hi thil tlawmngaihthlak tak pawh a nih ve a rinawm a, hei vangte pawh hi a ni mahna an ram ngei aṭanga, an rama siam rocket leh spacecraft hmanga van boruaka an in kap chhuak hi hahipa an sawi.
Demo-2 Mission
Demo-2 mission hi NASA Commercial Crew Program-in Crew Dragon hman theih tura a pawmpui hmaa enchhinna lian tham hnuhnung ber tur a ni a, space station-a mission rei tak kalpui theihna tura hmahruaitua ngai a ni.
NASA chuan hemi chungchang hi an website-ah tarlangin SpaceX crew transportation system engkim- Crew Dragon spacecraft, spacesuit, Falcon 9 launch vehicle, launch pad 39A leh an hnathawh theihte chu a rintlak a ni tih finfiahna a ni bawk.
Douglas Hurley leh Robert Behnken-te hian an Crew Dragon an enchhinna piah lamah hian Expedition 63 crew-te bulah hna an thawk dawn a, ni 30 aṭanga ni 90 inkar vel an cham hmel a, August 28 hma hi chuan an lo let leh hman rin a ni.
Lo let leh lam hi?
Behnken leh Hurley lo let leh hun tur hi la hriat chiah loh mah se Crew Dragon Capsule hmang hian Atlantic tuipuiah khawvel an rawn 'splash down' leh dawn a, GO Navigator recovery vessel-in a lo hmuak ang.
Ø Crew Dragon spacecraft kah chhuahna rocket kha Falcon 9 tiin a hming an vuah.
Ø Hurley leh Behnken-te hian an Dragon spacecraft hi a hmingah 'Endeavour' an vuah ve bawk.
Ø John F. Kennedy Space Center hi Neil Armstrong leh Buzz Aldrin-te inkahchhuahna hmun tho kha a ni.
Ø SpaceX leh NASA hian contract $ tluklehdingawm 2.6 hu an ziak a, ṭum ruk vel tal chu van boruaka an thawhdunna hnuaiah hian astronaut kah chhuah an tum.
Ø May 27 khan Crew Dragon spacecraft hi kahchhuah tum a ni a, mahse khua a ṭhat loh avangin May 30 khan an kap chhuak ta zawk a ni.
- Robert Behnken
Mission Joint operations commander a ni a, Kum 2000 khan NASA astronaut atan thlan a ni a, space shuttle flight pahnih- STS-123, March 2008 leh STS-130, February 2010 khan a nei tawh.
Heng mission pahnihah hian spacewalk ṭum thum ve ve a ti nghe nghe. St. Anne, Missouri lam mi niin Washington University, St. Louis aṭangin physics leh mechanical engineering-ah bachelor degree a zo.
California Institute of Technology, Pasadena aṭangin mechanical engineering-ah master's leh doctorate degree a zo leh a ni. NASA a zawm hma hian US Air Force-ah flight test engineer a ni ṭhin.
- DouglasHurley
Demo-2 spacecraft commander a ni. Behnken ang thoin kum 2020 khan astronaut atan thlan a ni a, space flight pahnih- STS-127, July 2009 leh STS-135 (final space shuttle mission), July 2011-te a nei tawh a ni.
New York lam mi niin Tulane University, New Orleans aṭangin civil engineering degree a nei a, U.S. Naval Test Pilot School, Patuxent River, Maryland graduate a ni bawk. NASA a zawm hma hian U.S. Marine Corps-ah fighter pilot leh test pilot a ni ṭhin. Demo-2 mission-ah hian launch, landing leh recovery-ahte mawhphurtu zawk a ni bawk.