China President atan Xi Jinping thlang nawn

China Parliament chuan kar kalta Inrinni khan lungrual takin an ram President atan Xi Jinping an thlang leh.

China Parliament, National People's Congress (NPC) session vawi 13-na neih mek a ni a, kum 64 mi hi President leh sipai hotu lu ber, Central Military Commission (CMC) chairman atan thlan a ni. Thlan tlin a nih hnuah Xi hian rinawmna thu a tiam nghal.

Xi Jinping hian kum 2013, March thla khan China President leh CMC chairman atan hian thlan tlin a lo ni tawh a, president term hi kum nga niin an ram danpuia President term a zawna ṭum hnih aia rei chelh khapna dan chu March 11 khan hlih a lo ni tawh a ni. Hei vang hian President Xi Jinping hian Parliament-in a thlan chuan President nihna hi a damchhung pawhin a chelh thei tawh dawn a ni. Xi Jinping hi CPC dintu chairman Mao Zedong hnua China hruaitu damchhunga rorel thei tura khawpa thuneihna pek leh awmchhun a ni.

President thar tur thlan rual hian vice president atan kum 69 mi, Wang Qishan chu thlan a ni bawk. 13th NPC Standing Committe chairman atan Li Zhanshu thlan a ni. NPC Standing Commiteee vice chairperson leh secretary-general atan mi 14 thlan nghal an ni.

Nimina session neih chhunzawmah, president thlan thar Xi Jinping-an an ram premier ni chhunzawm tura Li Keqiang a rawtna chu NPC member-te chuan lungural takin an pawm bawk. Li hi kum 2013 khan a term khatna turin premier atan hian thlan tlin a lo tawh a ni.